噚日恒指升142點，升幅近1%，不過H股指數更厲害，升164點，升幅達2%，逼近8000點大關。H股指數今次升得咁勁，主要由中資金融股所帶動，當中以招行（3968）升勢最凌厲，達5.24%，立即引嚟唔少網友議論中資金融股最新動向同未來走勢。
《香港討論區》網友Johnluk完全睇好招行前景，佢市值唔算大，好易炒起，而且憧憬晉身H股指數成份股之列，故笑言：「雖然佢已經升到13.7元，但現時都未算瘋癲，遲啲升得仲勁。」此外，建行（939）、交行（3328）及工行（3398）亦有明顯升幅，分別升2%至3%。中資金融股升得咁勁，部份原因可能同人民幣炒作有關。噚日人民幣又逼近7.87港元兌1美元，好快就同港幣1兌1，已經有網友呼籲將資金投資喺人民幣，或者喺國企金融股，相信到年底時回報會幾可觀。
中行係超級死火山
不過，並非所有中資金融股都有好表現，當中表現最差勁的，首選一定係中行（3988），噚日僅升1%，較其他銀行股極為遜色。網友ppcwalker話：「佢簡值係超級死火山，實在有太多貨喺街，未能吸得盡，好難會有大升。」而網友望天涯更直斥：「招行都升得咁癲，反而中行就好似死魚咁，郁都唔郁，相信同佢揸住大量國家外滙，被迫蝕到入肉有關喎。」