馬、泰都有秋冬暖身菜？玩Fusion嗎？唔好玩啦！「馬泰餐廳」嘅馬來西亞籍總廚Sakthi答：「對唔住！我哋淨係做傳統馬、泰菜式；嗰度每年12、1月最凍只有十零度，我哋會食咖喱、木桶焗飯暖身！」都成11月，香港呢個「溫室」仲有成21℃，剛剛先開始稍有入秋感覺，叫你整個羊腩煲都頂唔順啦！輕巧啲食個東南亞Feel木桶飯暖吓身啱啱好！記者：朱崇德
攝影：陳陶鈞
木桶香芋飯$60
份量夠一個男人食，以蠔油炒飯好特別！入口時仲有啲甜甜哋，原來係加咗泰式甜豉油吊味！材料簡單以碎肉、香菇、雜豆、鮮蝦等撈勻，別出心裁處是加咗炸香嘅芋粒，一開蓋先是香味撲埋嚟，入口煙煙韌韌，好有臘味糯米飯Feel，但少了油膩。
馬沙拉咖喱羊膝$60
馬沙拉係乜？Sakthi話：「即係Special咖喱咁解！」特別之處是濃稠啲，黃薑粉及辣椒等香料有驅寒作用；濃濃的馬沙拉好處係能夠包着羊膝每一嚿肉；羊膝亦特別選用18個月小羊，嫩口之餘，用叉尖輕輕一拮，骨肉分離，羊味唔羶又勁入味。
肉骨茶$48
肉骨茶係星馬等地名食，香港好難食到地道風味。明哥話：「個骨湯用10斤骨煲咗6個鐘製成，全部特選豬仔骨唔肥膩，個湯包清。」獨家配方是加入花旗參鬚、桂皮、焗蒜頭及當歸等藥材，味道甘甜，又有行氣活血功效，飲完成身暖笠笠。
蒜香田雞腿$50
唔講仲以為係雞上髀，明哥話：「呢種田雞特別喺馬來西亞訂返嚟，原隻8両重，齋肉都有成2至3両重！」輕輕一咬，肉地清甜，媲美食雞肉；如果用香港啲田雞做，早就炸到得排骨。據中醫講田雞有補氣消水腫功效，補補都幾好。
泰國蟹肉煲仔翅$78
以冬蔭功湯底做翅！再以小火爐座住食，睇見都㷫烚烚；入口！湯清而起膠，原來仲有老雞、豬肉做湯料，唔算太辣，味道多變；最正是每碗足2至3両翅，係夾得起嗰隻，配以適量蟹肉吊味，感覺更鮮！
焗釀蟹蓋$25/隻
秋冬肉蟹最當造，焗釀蟹蓋冇理由唔食；原蟹拆肉，再加鮮蝦膠做餡料，塞到成個蟹蓋脹卜卜，面層蓋上芝士，焗出嚟甘香可口；不過值得一讚的是加入了馬蹄作中和，清爽清甜啲，食落唔會太Heavy。
馬國暖食 香辣！
一坐低馬上有表演，總廚Sakthi在我面前玩拉茶，煮得興起又將薄餅拋起，真係好有地道馬國風情：「我喺馬來西亞住咗13年，唔好以為馬來西亞只得個熱字，雖然平時氣溫都有30幾度，不過最凍嘅12及1月，只有十零度，我哋一樣會着褸同食咖喱保暖！」不過馬來西亞華僑總廚明哥介紹嘅木桶香芋焗飯就啱晒我合尺！白米飯加粉粉的芋粒，放入木桶將熱氣一焗，有煲仔飯的熱熱飯氣、香芋又有糯米的煙韌嚼勁！「其實泰式嘅辣菜都好啱食，香港凍則凍，但仍帶點濕氣，食辣啲包你暖笠笠又祛濕。」
鬧市園林 清爽！
年紀大咗，真係好怕落油尖旺！人多車多、行步路都好似同人打交咁，咪搞！「馬泰餐廳」喺正天文台山腰，零零舍舍高咗上去，又唔似諾士佛階有扶手電梯，行上去都稍費氣力，老闆Leo話：「就係鍾意佢近天文台、樹蔭多，夏天都係全個油尖旺最涼快嘅地方！高咗上去山路蜿蜒，更是難得嘅一片『靜』土！」眼見午、晚飯時間，都係附近寫字樓OL或遠道揸車嚟嘅斯文客，園林美景、涼風颯颯，難得有種度假的閒適感。
食客有Say
「天氣涼就想食荔芋臘鴨煲，估唔到個木桶飯都好粉，仲冇咁油膩，值得一試！」
「個蒜香田雞腿送酒好惹味，而且好好肉！原來從馬來西亞運嚟，有啲誠意喎！」
「我係泰國人，我比較鍾意個煲仔翅，冬蔭功湯底好有泰式風味，有啲料到喎！」
搵食攻略
馬泰餐廳（23694033）
地址： 尖沙嘴天文台圍
環海大廈地下 L、M舖
座位： 100人
交通： 尖沙嘴地鐵站B出口，沿金馬倫道步行10分鐘
人均消費：$100
最好賣：泰式醃生蝦（$90）、炸蝦餅（$55）、馬來秘製海南雞（$98/半隻）
