日前路過灣仔Game場，有Game舖老細大歎：「PS3分得幾件貨咋！」大家心照，知道全世界賣遊戲機搵食嘅都為PS3缺貨而煩惱。其實愁嘅何止佢哋，網上大把Game迷更擔心落訂後未必即時有機玩。睇個勢，大家要苦等兩三個月都唔奇。喺呢段苦等嘅日子，惟有將一切有關PS3嘅資訊汁都撈埋，得閒同網友紙上談兵。而筆者就喺搵料過程中，發現Blog友介紹咗兩條日本PS3廣告片，值得拎出嚟分享吓。
第一條片講個男仔喺車入面，全神貫注望住遠處四條煙囱，接住畫面黑晒只見PS3主機一部加發售日期。好多網民睇完話：「太抽象唔明喎。」但睇過第二條廣告片，見個男人喺浴室望住兩個兩腳插蘇位，成件事終於明！原來SONY又出怪招，乜都唔講，淨想俾你知11月11號日本正式推出PS3啫！有創意，我鍾意，日期竟變做四條煙囱同兩腳插蘇，筆者真係服到五體投地。至於你又點睇呢？高手還是冇厘頭，咁就要讀者自己感受一下喇！
記者：陸俊雄
網址： http://www.youtube.com/watch?v=HVLVFPKhCLc