由劉德華投資的電影《師奶唔易做》昨日上映，董敏莉、雪梨、覃恩美及帕莎在戲中飾演來自不同背景及各具性格的師奶，四人透過學習肚皮舞而成為好友，令原本平淡的生活起了重大變化。
董敏莉在戲中飾演一名未婚媽媽，與10個月大的嬰兒有不少對手戲，她說：「我平時最多都係玩吓公仔，湊仔就梗係唔識啦，拍完呢套戲先至發覺要小朋友聽話係冇可能。我要多謝劉德華畀機會我拍呢套戲，至於戲中跳嘅肚皮舞，其實我以前都未跳過，好在以前跳開爵士舞，都有啲幫助㗎。」
雪梨少女時反叛
雪梨在戲裏飾演一名沒有主見且非常害怕老公的師奶，性格與現實中的她有很大分別，她說：「好多人都知我後生時好反叛，好細個就結婚生仔，我兩個仔女𠵱家都廿幾歲，反而細女嘅性格有啲似我，我以前成日唔出聲，唔係好識同人相處，成日俾人誤會自己唔開心，近年自己都笑多咗，可以避免呢啲誤會。」
覃恩美則憑《師奶唔易做》獲提名金馬獎最佳女配角，對此她感到十分高興，並說：「我係飾演一個自以為是又粗魯嘅屋邨師奶，最初都擔心會嚇親老公同個女，點知老公睇完大讚個劇本同埋成套戲都處理得好好。」
帕莎在20年前曾參演電影《海市蜃樓》，如今在演藝學院出任舞蹈老師，她說；「嚟咗香港13年，除咗教跳舞，重開咗呢間新疆菜館，新疆係我家鄉，開間餐廳都可以解吓思鄉之苦。」
採訪：卓美娟 攝影：陳偉權
場地：帕莎新疆菜館
