中國𠵱家好叠水，明知非洲同志窮到燶，借咗780億銀還唔，仲科多400億銀，貫徹5000年來「嘉惠遠人」嘅優良DNA。咁啱陳馮富珍前日終於跑出，成功做埋世界級領導人，一職抵千金，冇中央銀彈力撐點成事。不過，啲錢使得出亦搵得返。廣州噚日頒咗28個「榮民」（榮譽市民），個人「只需」投資2億人仔，企業嘅就4億，條數好襟計。
噚日羊城副市長南下香江時強調，錢唔係必然，有心都得，或者對社會有貢獻、愛國愛「廣」嘅人士就OK，但入咗圍都要過16個部門嘅「羅漢陣」，唔係咁易攞到「榮民」呀！今年就係第12屆，28人當中，台商10個，港人8個，出名嘅有哥頓胡應湘細仔胡文新、潮州林百欣嘅大仔林建名，估唔到蓮香茶樓老闆顏尊輝亦榜上有名，佢哋投資咗幾多？條數好複雜，總之全部及格。華華喺度要讚吓副市長王曉玲，各人捐贈過幾多都一清二楚，等來者可追嘛！