中移動（941）近呢5個月嘅表現，強到令人瞠目結舌，原來大藍籌都可以咁炒法。睇張走勢圖，係45度角向上直炒，乜嘢黃昏之星、三飛烏鴉等向淡訊號，全部係陷阱。唔少人揸住張圖睇位炒，以為食完糊再吼低位番兜，結果係揼到心口都瘀埋。
計吓數，港股由03年4月沙士後最低位8831點，到噚日收市18811點，累積升幅1.13倍；中移動同期低位係14.55元，噚日收報65.20元，升幅達3.48倍！如果淨睇呢5個月，結果更加震撼，今年6月中，恒指低位15204點，截至噚日收市計，升咗23.7%；中移動同期低位38.54元，截至噚日收市，炒高69.2%！以一隻咁大隻嘅股份，三扒兩撥升7成，真係令人大開眼界。
隻股咁升法，低位冇貨喺手嘅，冇乜幾個夠膽喺中途上車，唔少人都等佢出現一個大調整。過去兩日，隻股由69.70元高位連插兩日，噚日跌1.85元，佔大市128點跌幅嘅115點，由高位計，已經冇咗6.5%，散戶點睇？
陰謀論：做低等散戶接
喺《Uwants討論區》入面，網友terry10422好有信心咁話：「941必收復失地。941今日受批股謠言影響急跌，不過如果真係批股，點會事先張揚，等股價急跌先批股。好似恒隆地產（101）咁，話批股就批股，絕無事先張揚。」
aibo99就另有見解：「唔做低佢，點吸引散戶入市接火棒呀！」
純睇走勢圖，中移動前日出現烏雲蓋頂，噚日以大陰燭確認反彈乏力，周線圖截至噚日為止，出現射擊之星，如果星期五之前唔彈番上去，周線圖會好肉酸。不過，呢隻股係非一般強勢股，正如上面所講，圖表上有好多陷阱，短期如果再來一支陰燭，可能係短炒一轉嘅機會，博佢上番69蚊。如果冇乜嘢特殊壞消息，強勢股好少俾一個V形頂一鋪打沉。
余文