一位讀者來郵云：「每日拜讀閣下短篇，賞心悅目，敢問閣下是否尹思哲先生？因為不論行文或內容，分析或論點均十分相似。純屬好奇，別無他意。」
呢位讀者誤會了，尹思哲乃青年才俊，前途似錦，唔係左丁山呢類過氣人物，尹思哲乃費比加斯，左丁山已係舒寧咸咯，請勿誤將馮京作馬涼。
馬會會員P好日唔去馬場，上星期五居然委託左丁山代為買馬，四隻獨贏位置過關，買四串六，一共二十四注，只有孖寶，冇過三關、四關。會員P話四隻心水馬，唔會中齊晒咁啱嘅。左丁山入到馬場，首先就係代佢落注，後回心一諗，如果會員P中晒，自己冇份，咪走咗雞？於是拎番張飛出嚟，照抄一次，注碼細好多，買四串十一。因此而睇真啲會員P買啲乜嘢馬：原來係第三場東方遊戲，第五場無敵精英，第六場鐵血丹心，第十場寶樹勁盈。心諗「東方遊戲」今季初出，上季仲喺第五班，點同啲第三班馬跑呀，會員P可能唔知道啲背景喎。於是自己改咗買第三場「飛快贏」，呢隻馬有根有據，啱啱贏過沙田千六米，點會輸畀「東方遊戲」呀。
慘矣，東方遊戲跑第二，飛快贏唔知跑第幾，自己落筆打三更，信心盡失，以後幾場心水，唔敢過關，點知隻隻贏晒，即使買七串一（其實只有六串一可下注）都掂，會員P四關過齊，代佢收錢收到手軟，自己就冇乜收穫，所以人哋好運，的確唔同，咁好貼士送到上門，自己都要改一改隻馬，你話抵死冇！最慘就係是日六環彩有多寶千幾萬，自己條飛過咗五關咋，就係冇隻第九場「健康特快」，為之暈得陣，哭馬喪之時，財經編輯笑左丁山：「枉你有咁多資訊，『健康特快』馬主方正啱啱做咗證監會主席，好旺啫，你都唔拖埋佢隻馬？」跟住地盤C來電報喜，佢老早買咗幾百蚊六環彩，條條斷纜，但星期六中午飯後返工之前，心掛掛，走去投注站補多一條飛，就係第九場要一隻啫──七號健康特快，五元一注，收咗一半彩金，成十四萬銀，佢話呢啲叫做財來自有方喎！左丁山聽完，更加呼吸不順暢！