SONY一擲億金，投入最高科技喺PS3上，除想繼續霸佔七成遊戲機市佔率外，新機不容有失嘅另一使命，就係要順利推動Blu-rayDisc（BD）成高清影碟標準。噚日同大家詳盡報道過PS3打機、上網表現，今日就輪到測試佢喺多媒體方面嘅實力，更搵嚟中港台都有影音專欄嘅發燒友周公，為大家解讀PS3嘅影音優劣！
記者：徐影龍
攝影：伍慶泉
Blu-ray勝算高
周公本來唔多睇好Blu-ray，事關早前BD播放機一到港，便試睇過《歌聲魅影》，感覺只係靚少少，無乜驚喜，佢話可能之前DVD版已經好靚，所以唔覺BD版有乜特別。今次試睇PS3卻完全改觀：「無可厚非BD版《M:i:III》真係做得好靚，而且播放快鏡幾連貫，令我對Blu-ray重新評估，加上其他多媒體支援較多，如陸續出現嘅BD燒錄機、內置BD嘅電腦等，感覺上氣勢比HDDVD陣營較強，令到HDDVD未企穩已急於宣布推出第二代！而我亦認為最終勝出者將會係Blu-ray。」
讚完一輪，周公忍不住彈兩句：「得一組HDMI，顧得Blu-ray就顧唔到SACDMultiChannel，一個頭玩齊兩樣要搭好多嘢同搞一大輪，兼且驚佢互相影響。不滿冇咗1080i/p嘅Upscale（倍升解像度），普通DVD最多只倍升到480p，最大問題係定格時，影像噪訊及跳位相當礙眼，基本上過一千蚊嘅DVDPlayer都唔會咁失威，幸好BD播放時問題唔算嚴重。」至於音效方面亦令人擔心：「HDDVD早已擺明跟杜比DigitalPlus7.1靠攏，Blu-ray就遲遲未落實，連dtsHD7.1都未知係咪對應，好失敗！」
最後周公話要將Blu-ray同HDDVD確切分出勝負，起碼要有同一套高清電影、同一個HD靚芒，以及兩部播放機，咁嘅陣勢喺今次PS3試玩上難以實行，連周公都期望有朝一日可讓兩者公平鬥番次。
發燒友蠢蠢欲動
試玩當日另一影音寫手李廸偉（David）都有到場試埋一份，佢更講出家陣香港發燒友極期待PS3有出色嘅影音表現。要踏入Blu-ray門檻，PS3比街賣緊嘅播放機足足平一半，仲未計兼容SACD、打機同上網等功能。若然PS3有番咁上下水準，一定成影音界寵兒！
睇完幾套Blu-ray影碟，David對PS3讚口不絕，比當初以遊戲機水準評估高得多，尤其顏色及層次方面有板有眼！最可惜係SCEH將PS3音源輸出至只得立體聲嘅BRAVIA，未能以5.1喇叭測試帶嚟嗰幾隻SACD，不過David對PS3播SACD絲毫不擔心！
120×極速搜畫
兩大猛人講完PS3畫質，筆者就以普通用家角度講番Blu-ray嘅表現；進入BD播放模式後，操作上跟傳統DVD沒兩樣，揀完音效同字幕便可正式播放，中途亦可Call出Blu-ray特有嘅Pop-up菜單顯示。一邊播片一邊慢慢轉選項，字幕、角度等轉變即時顯現出嚟。配合PS3特有嘅半透明式混合選單，揀Chapter，前後搜畫或定格等都可即時做到。最正係用到1080p全高清播放時，快速搜畫仍順暢無比，最高速更可達120×，一套《SWAT》不消一分鐘便由頭播到尾，證明PS3用2×Blu-ray雷射頭已足夠有餘。
基本上混合選單已包含一切操作選項，介面類似PS2＋PSP，玩開應好快上手。較特別係影音資料顯示，如幾多音效聲道輸出、音質採樣比率、畫質數據流量及影片格式等統統列明，一套片做得好唔好基本上已可略知一二！
DIY燒碟全部睇得番
要玩盡多媒體，一定要對用家自行燒錄嘅光碟有極強兼容性，PS3喺呢方面全部過晒關，筆者先後以CD-R試播數碼相、DVD+R播MPEG4電影、DVD-RW播自製DVD，全部都兼容冇鑊氣，讀碟亦相當順暢，最難得係筆者自製嘅混合DVD（影片＋相片）一樣播到，音樂SoundTrack跟番晒，呢點已值得加分！燒錄式光碟無問題，但AVI及DVDAudio則未有對應。
BDVSDVD魅力逐格睇
Blu-ray及HDDVD兩大高清制式畫質上仍不相伯仲，反而問到好多人，均只知Blu-ray好靚，但到底靚過最普及嘅DVD幾多、靚喺邊度等，通常好少人答得出，今日就以BD及DVD版《M:i:III》為大家指出新世代影碟過人之處。
高解像現層次
講Blu-ray，第一梗係先睇解像度；1080pFullHD（全高清）真係唔講得笑，以呢幕梵蒂岡場景為例，DVD版只叫不過不失，Blu-ray版則將所有細節重現，圓頂教堂及天空雲端嘅層次出晒嚟，連旁邊樹葉都明顯見到Details。
光暗邊位更銳利
暗渣位一向係數碼影像弊病，好彩今次喺BD內均得到改善，尤其呢幕貨車爆炸一刻，火光飛射嘅邊位變得更清更銳利，透過灰暗玻璃窗仍望到遠景，Detail位仲好清楚㖭！至於DVD版喺呢兩點只可用「揦埋一嚿」嚟形容。
芥辣黃考功夫
聽周公講，芥辣黃一向係播放機同屏幕嘅大敵，如果用緊嗰部唔係靚機，大多落得瘀黑或太假收場，播得靚真係好考功夫。而周公今次亦大讚PS3搭BRAVIA表現出色，芥辣黃跑車襯MaggieQ鮮紅晚裝，兩色相撞BD仍有不俗表現。
幼細位唔會「盟」
高解像帶嚟嘅好處，並非單單令畫面更靚，好多電影內嘅細微位都可清晰重現，如搶救人質一幕，DVD版難以睇真車身Logo及英文字，Blu-ray版則將齒輪Logo清楚顯現，旁邊字體亦冇咁「盟」。
超靚相簿模式
筆者對PS3呢個相簿模式印象實在深刻，數碼相片不論儲存喺記憶卡、光碟或硬碟內，均可使用呢種相簿顯示，所有相排好隊、分晒日期咁逐張「飄」落嚟，仲扮真正3R沖曬相片咁會曲起，白色背景加淡淡陰影，整體感覺勁好Feel！襯埋音樂同SlideShow，當ScreenSaver或回憶片段咁慢慢欣賞都得。
12月AGS親身體驗最實際
呢兩日各大傳媒瘋狂報道PS3嘅測試報告，加上行、水貨快將到港，PS3氣勢一時無兩。聽埋咁多新料，倒不如自己親身體驗仲實際！喺下個月15號開始一連三日，又到亞洲遊戲展（AGS）開鑼，屆時SONY展館將擺放多部PS3及新Game供入場人士試玩，更有第二批行貨即場發售，絕對係買件聖誕禮物畀自己嘅好時機！
周公起底
15年撰寫影音專欄經驗，對畫質要求特別高，緊貼影音科技發展，作品遍布中港台，目前喺《Hi-FiReview》、《HDAV》、《AVMagazine》及《E-Zone》有定期專欄。
