泡沫，泡沫。孫柏文相信大家都聽過有人用過呢個詞，去形容某一樣投資項目嘅投機成分去到瘋狂階段。究竟點解啲人會用「泡沫」呢個詞，去形容啲瘋狂炒賣活動？其實，人類第一次用「泡沫」去形容瘋狂炒賣，係形容一間成功塑造同政府有千絲萬縷關係，繼而令人相信有特權，透過頂尖財技將股價翻幾番，不過最後股價狂瀉嘅公司。大家可能會問：「泡沫呢個詞，好似喺盈科數碼動力出現之前已經有，孫柏文你有冇搞錯咗？」你估盈科係第一間公司依靠塑造「有特權」形象、財技等等嘅手法，令股民如痴如醉咁將股價炒起，跟住夢碎後股價狂瀉咩？
1720年前宗主國，有一間叫做SouthSeaCompany嘅公司。首先，呢間公司成功奪得英皇御准專利權，壟斷經營由非洲運往西班牙控制南美洲新大陸嘅奴隸貿易業務。跟住大玩財技，進行多次股債重組，仲要大派認股證畀國會議員、政府高官、王室成員，令全國權力核心從公司股價上升得到利益。公司當然大力咁去煲大南美洲嘅潛能，話商機無限，又叫啲財經口水佬同分析員計啲天文數字出來。最後，仲要撞正喺法國都有一個叫做JohnLaw嘅人成功炒起「新大陸」概念，令前宗主國股民更加相信SouthSea會賺大錢。就係咁，SouthSea股價由1月128英鎊炒到7月超過1000英鎊一股。
不過最後醜婦都終需見家翁，SouthSea股價開始狂瀉（見圖），1720年12月股價淨番150英鎊一股。當時有一個評論員則曾經講過：「SouthSea股價有如南方海洋上的泡沫一樣，一篤即破。」因為SouthSea泡沫出現於1720年，所以早100年嘅鬱金香狂熱tulipmania，都係叫做「狂熱」。
今日同大家分享呢個故事，係因為今時今日恒生指數喺19000點嘅高位，孫柏文覺得係一個不折不扣嘅泡沫。不過有如SouthSeaCompany嘅股價一樣，如果你喺1720年嘅6月，股價800英鎊一股嘅時候問我：「你估仲有冇得升？」我會話：「有。」不過如果你再問我：「究竟抵唔抵買？」我就一定回答：「絕對唔抵買。」不過我相信，就算你應為絕對唔抵買都好，都可能因為仲信有得升而入市，呢個就係人類本性當中嘅貪念。
呢幾日來，孫柏文都有話過恒指上2萬點，提供過班大鱷點解會將中移動炒上80元一股，最後仲要話上2萬點嘅動力會來自地產股。有人話孫柏文咁高都仲要話有得升會害人，雖然我明白人個個都可能因貪念而「出事」，不過孫柏文絕對對讀者有信心，能控制貪念，而不致於引火自焚。之不過如果要問我：「你估仲有冇得升？」我就答咗：「有。」
如果大家有讀晒喺《蘋果日報》財經版嘅專欄，相信大家都會覺得除咗《金手指》一欄之外，好多都充滿智慧。而喺1720年嘅前宗主國，相信最有智慧嘅人就肯定係牛頓SirIsaacNewton。佢喺SouthSea一役當中都輸咗2萬英鎊，令佢當年都慨嘆一句：「我能預測星體運行，不過對人類嘅瘋狂就毫無頭緒。」所以好似《信報》曹仁超先生話齋：「有智慧不如趁勢！」