噚日個市好有末世感覺，朝早中移動（941）已見被大戶力沽，全靠地產股頂住，頂完地產股推隻大笨象上去，等人以為藍籌輪流炒，個市唔死得，就連財經演員，都喺電視話個市唔會點跌。跟住，連藍燈籠和黃（013）同電盈（008）都升埋，仲唔知驚去炒埋最後一浸水尾，係最危險嘅事。
末世感覺仲有來自十年都唔炒嘅中電信（728）等股票都相繼炒上，要知道落後股總有其落後嘅理由，到強勢股炒到唔炒要跌，靠落後股支撐個市，總令人覺得個市見頂。另外一個奇怪現象，係20大升幅股之中，有10隻係創板股，仲要大部份無乜成交亁升，個市係咪想像中咁旺，從中可見一斑。
唯一稍有成交嘅創板股，升幅達11倍，相信港股歷史上單日升幅計，係數一數二。呢隻股票叫寶訊科技（8089），升得咁急，因為股權易手，持有22%股權嘅原大股東將所持股份全數於場外出售，作價8仙，買家只須419萬蚊就可以取得一隻創板股控權。要知道一間公司即使上創板，都要使唔少錢，連同創業資金，𠵱家收400萬銀就肯拱手相讓？肯定大有問題。
116萬元嘜高1億市值
更離譜之處，係隻股票全日成交只係116萬銀，但係市值卻被炒高超過1億，新買家只要滲少少貨出街，隨時都可以賺番個買殼成本。呢類股權極度集中嘅股票，好易吸引貪心嘅散戶入場，對付方法係任佢點升都當呢隻股票唔存在，千祈咪一時貪念而接火棒。
歐陽風