謝霆鋒和張栢芝兩個月前秘密結婚，但婚後卻頻頻高調晒恩愛，昨日二人轉移陣地，有人事先通知傳媒到養和醫院欣賞他們的拍拖真人騷。事緣霆鋒前晚為慶祝奪內地電影節男配角獎，在灣仔宴請台前幕後擦潮州菜，昨日凌晨他忽然發燒，又屙又嘔，結果取消本來飛赴杭州公幹的行程，在愛妻栢芝陪伴下入院留醫吊鹽水。
謝霆鋒本預定昨午飛往杭州出席「中國浙江電視觀眾節活動」，但因抱恙臨時取消行程，昨早有人通知無綫、有線兩間電視台及大批記者，指霆鋒會在下午約1時抵達養和醫院，結果他真的在1時20分左右現身，並在傳有身孕的凸肚愛妻張栢芝和助手阿輝陪伴下高調入院，戴上cap帽遮掩亂髮的霆鋒滿面鬚根，顯得沒精打采，戴墨鏡的栢芝則披頭散髮，不發一言，默默伴在丈夫身旁。
難得請客
獲獎興奮大魚大肉
霆鋒步進醫院時，記者問他病況如何？他答道：「睇完醫生至講。」栢芝則一直頭耷耷跟隨丈夫上病房。約一個多小時後，助手阿輝向記者透露霆鋒病況說：「凌晨三點幾，霆鋒慶功完返咗屋企，佢打畀我話發燒，到今朝近天光時，佢又屙又嘔，佢食咗啲藥睇得唔得，但冇好轉，焗住取消今日去杭州，主辦商都好體諒。」
問霆鋒是否食物中毒，阿輝說：「唔清楚，check咗先啦，醫生叫佢留院觀察，霆鋒都唔想留院，佢要吊住鹽水先。」晚上阿輝再透露霆鋒患上腸胃炎及有少許哮喘發作，他說：「霆鋒驗咗血同大便，腸胃炎冇乜大礙，可以出院，醫生建議佢休息一晚。」霆鋒預計明日會到三亞出席「華夏濃情慈善助學音樂會」，後日會與栢芝如期出席同場表演的武漢音樂會。
霆鋒前晚是在其老闆楊受成有份投資、位於灣仔的潮州世家舉行慶功宴，慶祝他憑《新警察故事》一片，奪得內地金雞百花電影節最佳男配角獎和杭州人最喜愛的演員獎，菜單十分豐富，大魚大肉，包括潮式大凍花蟹、油條生炒蠔仔、花膠燴潮州翅、脆炸蝦蟹雙棗、潮式煮大海斑、鮮草菇煮水瓜、普寧豆腐雞煲、上湯潮州白菜、潮式糖醋伊麵、清心丸綠豆爽及蒸千層馬拉糕等。
席間被經理人霍汶希（Mani）取笑難得請客的霆鋒，被問到是否因要養老婆仔女才特別慳儉時，他打趣說：「乜呀，我平時都咁慳，你睇吓我着嘅衫都係幾年前買落。」
有報道指霆鋒將獎項送給母親狄波拉（拉姑）作生日禮物，霆鋒則說：「吓？唔係呀？關佢（指母親）乜嘢事？不過噚日（大前日）同媽咪慶祝生日，見過阿妹（謝婷婷），淨係老竇未見啫。」問霆鋒近日有否帶栢芝見拉姑，他說：「唔講，你問佢哋兩個啦。」再問他是否會送一個孫仔給母親作生日禮物？他只說：「冇喎，邊有呀？」
抵抗力弱
同枱食飯一人出事
昨日蔡卓妍（阿Sa）和Mani到醫院探霆鋒，阿Sa說：「我同Mani傾完嘢，都未知霆鋒點樣，過嚟探吓佢。」Mani探病後則說：「頭先我睇佢，佢瞓咗覺，栢芝都瞓咗，熄咗燈，佢兩個都好攰，栢芝成晚照顧佢。噚晚我去慶功都有份食嘢，冇事呀，唔關噚晚嗰餐事，都唔關霆鋒去柬埔寨拍嘢事，係佢攰，抵抗力弱咗。」
曾暗示認仔不認新抱的拉姑，至昨晚為止均沒有探望霆鋒，阿輝稱怕拉姑擔心，故到傍晚仍未通知她。記者昨晚致電拉姑時，其手機傳來長途電話鈴聲，一把女聲接電話後「喂」了一聲即收線，其後一名男士代拉姑接電話時說：「佢開緊會。」
霆鋒父親謝賢（四哥）同樣不知兒子入院，他在電話中說：「冇通知我喎，腸胃炎好小事啫，小事先唔畀我知，如果有事就一早打嚟，不過我都會打電話問吓佢。」對栢芝未曾致電通知，四哥笑說：「小事啫，唔通我屙屎唔出都話畀人知咩？大個仔，自己識照顧自己。」
採訪、攝影：娛樂突發組、胡比、駱華齡
