美股大升120點加上銀行減息，港股真係輕易升穿萬九點，下午更逼近19200，但之後突然有龐大沽盤將個市推低，期指由高位大跌300點落去，然後又由低位挾高100點上去，期間嘅波幅認真誇張。
雖則話個市屢創新高後自然風高浪急，但係高位來回大幅波動咁多次，好明顯係好淡大戶正激烈交鋒，遇上呢種極度凶險嘅市況，係時候做好防風措施。
其實趙飛雲昨日睇見大市狂炒落後國企，而國企及藍籌中嘅「藍燈籠」中電信（728）及和黃（013）忽然炒起，總覺得升勢令人唔多舒服。噚日恒指連升多日後高位出現烏雲蓋頂，相信即使唔係中期見頂，都有機會係短線見頂。
美聯（1200）開市便破位急升，趁開市無耐買入，雖則係高追，但係圖表走勢的確吸引，惟有訂入市價5%止蝕博一鋪，即跌穿4.10元水平走人，地產股剛剛起動，估計唔會咁短癮。
炒工行C輪好蝕章
至於工行（1398）短期即使回落，應該唔會跌得太多，因為仍有機會炒入富時指數同摩指。不過，即使睇好工行短期表現，趙飛雲都唔建議玩工行輪，因為呢批新輪引伸波幅仲係偏高，噚日正股早段升，C輪已經唔係好去，收市跌2仙，C輪即勁跌，炒呢啲輪會好蝕章。
趙飛雲