自從大班鄭經翰同黃毓民喺電台封咪之後，大氣電波冇咗兩支咪係度嘈嘈弊，班官員耳根清靜咗好多，而因為大班同煲呔嘅友好關係，佢亦都被人取笑為煲呔針，日日困喺立法會，發言講多句都俾人叮，自然相當冇癮，所以民主派內一直流傳，大班一直想另起爐灶，自己搞個電台，佢想要重振聲威，最近仲有政界中人言之鑿鑿話，明年初大班電台有機會搞得成㖭！
唔搞地下電台
八方聽見咁嘅傳聞，就梗係去問大班有冇件咁嘅事，點知大班一口否認，話自己成60歲，不如享吓清福好過，無情情為乜搞個電台先！𠵱家做議員唔知幾過癮，起碼唔使5點鐘起身咁辛苦，又話投個電台牌要成三億，佢邊有三億！而且搞電台如果真係咁好搵，「一早大把人搵我開咪喇！」佢又話自己一定唔會好似老牛曾健成咁，搞地下電台喎！
正當八方以為收錯料嘅時候，有知情民主派議員又走嚟同八方講，呢個傳聞空穴來風，未必無因，事關大班自己私下同唔少老友講過要搞電台，民主派好多人都聽過，只係大家從來冇講出嚟。
猛話自己冇錢
有個大班老死仲話，大班一直搞緊開電台單嘢，只不過因為呢單嘢太敏感，唔可以咁早曝光，特別係當年大班原本諗住喺now租條頻道，同老拍檔林旭華開咪，點知單嘢俾人爆咗出嚟，結果臨門一腳「撻Q」，所以再有乜同開咪有關嘅嘢，大班都絕口唔再公開講，總之就私下做嘢算。
咁樣大班又有冇機會整翻個電台牌玩吓呢？官場中人就話，若然政府認為有需要，要發多個牌，都唔係話一定唔得，就好似陳偉業今日先喺立法會提動議，要政府開放大氣電波，但就要睇吓公眾係咪同樣有咁嘅訴求，不過，就算真係發多個牌，都唔係話畀邊個就邊個，都要攞真金白銀出嚟投過，雖則未必個個好似大班咁鍾意搞電台，但係要有牌，冇錢一定冇得傾。
大班噚日唉聲歎氣猛話：「流料！」佢邊有咁多億「蚊年」投個牌呢？但係有商界中人就好唔同意咁嘅睇法，佢哋話大班要搵水喉，唔係咁難啫：「若然大班真係要搵人撐佢，一定有人撐嘅！你哋咪睇小大班先得，淨係當年「沙士」期間，捐橙畀佢送畀醫護人員位才俊，都肯定會撐佢啦！」大家話呢？