今年係貿易發展局（TDC）成立40周年嘅大日子，為咗慶祝呢個重要時刻，貿發局推出連串活動助興，當中最特別的一環，係搞個「商貿世代──香港貿易40年」展覽會，同大家回顧吓過去40年，香港呢個彈丸之地點樣工貿騰飛，成為全球第11大貿易體系，創下每年逾4.5萬億元貿易額。
展覽會11月29日至12月1日喺會展天橋走廊舉行，展區內會有一個時光倒流區，攞放暖水瓶、塑膠玩具、紅A水桶、飯壺、撥號電話、原子粒收音機等香港製造產品，仲會邀請你穿膠花，欣賞60年代工廠女工跳動感舞蹈，又可以喺70年代家居布置前拍照，同大家想當年，夠晒特別。
另外又設鏡林反照區，講貿發局點樣同港人一齊開山劈石，從代工生產做到品牌生產，從勞工密集做到創新經濟，建立香港國際地位，最後一個香港成就區，就梗係show吓香港人多次攞獎嘅威水史啦。
華華覺得，上一代好多香港家庭都試過穿膠花幫補家計，當年香港首富李嘉誠都係做塑膠花起家。若果搵佢即場示範，就仲有意思。