澳門陸續有新賭場落成，市面一片繁榮，連帶住宅樓市都變得好景，新盤宣傳活動一個接一個，記者幾乎應接不暇，少啲魄力都唔得。
繼噚日新天康投資，搞個「海擎天」採訪團，一早坐船過大海，就搭直升機鳥瞰澳門新建設，跟住睇示範單位，再安排專車環島遊，海陸空乜都有，務求全方位多角度，將澳門睇真啲，感受繁華氣息。
今日雖然唞一唞，但有另一壇同賭有關嘅記者會，咪係美高梅集團推介，美國拉斯維加斯大道區嘅CityCenter綜合發展項目，總投資額70億美元，設施包括酒店、賭場、購物、飲食同娛樂中心、豪宅等，09年開幕。
其中嘅豪宅會全球公開發售，香港咁多有錢佬，梗係要嚟推介吓啦。
明日又要再去澳門，參加由LeSalleInvestmentManagement發展，南灣湖C9區項目動土典禮。
兩個世界知名嘅賭業城市，同時有住宅盤推出，唔知啲香港客會點揀呢？