喺呢幾個月，最惹人關注嘅交通問題，肯定係多宗涉及大型車輛不小心倒車，撞倒途人引致多人傷亡嘅意外；最嚴重一宗係喺上環發生，一部貨車從倔頭巷倒車駛出大路時，懷疑車速過高同埋司機無睇清楚路面情況，最後釀成一對父女命喪輪下。
呢啲駭人聽聞嘅交通意外發生後，有唔少駕車人士喺倒車時都特別留神，慎防意外嘅發生；而有關當局亦出盡辦法，除咗希望立例大型車輛要加裝倒車鏡頭外，更要求佢哋喺倒車時必須搵人幫手，避免再有同類意外發生。
不過，我反而覺得政府修例固然重要，但司機合作與否都係其中一個重點；家陣唔少重型車輛都無加裝倒車鏡頭，倒後泊車時亦無搵人幫手睇位，就連車速都唔係慢嗰隻，咁做真係好容易會發生意外㗎。其實花多數千元加裝倒車鏡頭，又或者喺附近搵人幫手睇位，係咪真係咁難呢？
我諗當你發覺咁做，對自己同其他道路使用者係安全的話，你就會覺得值得㗎啦！
記者：鄭達基