港股衝到上19000水平，風高浪急，大家心中有數。噚日恒指再創新高，中段曾見19161，再大升225點，但升得急，跌得亦快，噚日下晝幾下手勢，唔單止升幅全部消失，最低時仲落返18855，跌咗80點，收市雖然打個平手，但紅燈已亮起。
中移動（941）畀大戶攞嚟造指數，當佢股仔咁炒，最高搶上69.70元，但又質返落66.25元，高低相差3.45元，如非滙控（005）有0.80元進賬，個市早已單日轉向。噚日成交大增到517億元，好多人趁高獲厚利回吐，但承接力亦唔弱，大戶好淡鬥法（呢鋪唔關散戶事），已鬥到出晒火，噚日只係第一次「狼來了」，再嚟多兩三次，真正嘅大調整先會出現。
今日講另一隻搵食股，就係高寶綠色（274），噚日最高0.92元，收0.89元，仍有2仙進賬，成交就大增到3500多萬股，係半年來嘅高紀錄，呢兩日股價同成交都有異動，短線應有機會。
化妝品業務有條件分拆
本來前日已收到料，話高寶有大動作在醞釀中，諗住再探清楚先推介，點知公司快快趣自己交代，話正同一名國際機構投資者進行磋商，後者正考慮認購高寶旗下一附屬公司之少數股東權益。高寶少有同大行基金拉上關係，今次若能成事，會令人另眼相看。
公司冇講明係邊間附屬，高寶旗下好多業務，包括生產家居及個人護理產品、工業用產品、化妝品及護膚用品（MB）、同生物科技產品，其中以MB的業務發展得最速，賺得亦最多（今年上半年分部業績就有1億元），大芬要入股，相信九成九係MB，而MB亦具備晒條件分拆上市。
估計MB1年賺1.5億元，以零售公司保守10倍PE計，已值15億元，而高寶成間公司市值只係9億元。
高寶連升兩日，已破晒位，中期上升大浪開展，短線可重上5月高位1.20元，中線目標1.50元。
郭兆誠