已故慈善伶王新馬師曾（原名鄧永祥）於97年病逝，祥嫂洪金梅與四名子女在祥哥生前已為爭產而斷絕親情，想不到逾10年後，一家人又戲劇性地來個大團圓。長子鄧兆尊昨日接受本報專訪時，回想母子這10年來的分離，他形容母親如未長大的「𡃁妹仔」，在外吸收10年人生經歷後，現在應明白甚麼值得珍惜。
新馬師曾病逝後，祥嫂便搬離一家人齊齊居住的永祥大廈，近日她與子女和好後，曾要求重遊舊地，不過永祥大廈在他們爭產期間已經出售，今日兆尊與母親重聚，會否因此事而對祥哥感到內疚？兆尊昨日接受本報專訪時感慨道：「大家都知，當年我哋要幫阿爸找幾千萬醫藥費，阿媽又攞晒啲錢走咗去，咁我哋手緊先迫住行呢一步，但呢啲事已經過咗去，我哋見番，冇再提呢啲舊事，一切已成過去，總之邊個啱，邊個錯都好，我覺得已經唔重要，佢都年紀咁大，仲同佢計較咩？始終係我阿媽，當然個心都會關心佢。」
姨丈拉攏
否認團圓與錢有關
永祥大廈轉售給東華三院後，兆尊與胞弟兆榮及胞妹碧玉繼續向東華租住永祥，昨日兆尊安坐祥哥位於13樓的故居接受專訪時，暢談與祥嫂和好的始末，他說：「其實媽咪幾年前係咁迫我哋打官司時，我已經主動搵過佢唔好再打官司，不如和好，當時係佢唔肯，咁我哋咪奉陪到底，講真大家始終係一家人，和好係遲早嘅事。」
對於外間有傳他們和好是因祥嫂肯賠錢給子女，兆尊否認說：「我可以好肯定話畀你聽，我哋肯見番面，同錢根本冇關，因為媽咪已經係輸咗官司，嗰幾千萬佢係咪都要攞番出嚟，其實係大姨丈專登喺夏威夷返嚟做和事老，搵我媽傾完偈，佢就回心轉意約小艾見面。都咁多年啦！佢都想有番啲親情，𠵱家同佢差唔多一個星期見兩次面，噚日我先俾佢捉咗去做身體檢查，佢話我咁瘦，唔知係咪有病，咁咪順吓佢意囉！」
前日兩母子齊在街上走過時，有街坊上前恭喜祥嫂，令祥嫂十分高興，還向兆尊說：「原來我做番啲正面嘢！街坊咁受。」兆尊表示與母親重聚後，兩人心情均明顯比較開懷，他說：「見到佢咁開心，我都好開心，以前媽咪成日以為我哋細個唔識嘢，佢好專橫，𠵱家就冇啦，佢會同我哋有商有量，其實佢咪係一個未長大嘅𡃁妹仔，好多嘢佢都唔知錯對，喺出面闖咗10年，經過磨練，終於明白邊啲係錯，邊啲係啱。」
星途浮沉
娛圈發展當作興趣
問到兆尊與三位弟妹的近況，他說：「兆榮結婚生埋個仔之後，已經比以前定性咗好多，小艾同老公感情就危危哋，我已經同佢講，有乜事佢同個仔可以隨時返嚟，𠵱家我同兆榮、碧玉各自住喺12樓嘅單位，一人佔一個，碧玉早排做咗一輪銀行工，𠵱家冇做嘢，重搵緊自己路向。而13樓全層係阿爸嘅故居，我哋繼續租落嚟，細佬將呢個單位裝修到成個博物館咁，當係用嚟紀念阿爸，但暫時唔會對外開放，𠵱家每日我都會上嚟裝香畀阿爸。」
兆尊在娛樂圈發展多年，星途始終未如理想，祥嫂現在仍對其事業十分緊張，認為無綫對他不夠好，昨日兆尊不以為然地說：「TVB有咁多人，好難話個個藝員都照顧到，我同阿媽講唔需要咁緊張，呢兩年我同細佬做金融投資搵番嚟嘅錢，相等於我喺無綫搵嘅13年人工，所以做娛樂圈我都係當興趣，唔會靠呢行嚟搵飯食，寧願同個細佬搵生意搞吓，賣咗永祥連同其他產業，我哋幾兄弟妹成立咗個基金，啲錢由細佬管理，我好少過問財政。」
採訪：陳月媚 攝影：林德雄
