恒指昨日有如玩過山車，大起大落，接近尾市時，短短15分鐘內直插250點；但好友瞬即反撲，幾分鐘後反彈近百點，恒指最終仍能以升近3點收市。多方網友覺得這種過山車滋味十分刺激，令人大開眼界。
《香港討論區》網友認為今日似乎係有基金洗中移動（941）個倉，恒指急跌都係因為中移動沽盤大量湧現所致，可能同傳佢配股有關，所以佢尾市股價跌近2元；如果屬實，更有機會變成股災。
散戶被迫接貨 沽唔到
有網友稱，19000點簡直是大戶肉搏戰，不斷於高位沽貨；而散戶就被迫接貨，恒指收市前幾分鐘，想沽都沽唔到。網友nightfiber話：「大戶係數分鐘內派貨，散戶肯定要接貨。如果係咁，相信距離大調整應該不遠了。」期指收市低水16點，加上18800至19000點有好多沽盤，難怪不少網友指短期內會出現調整。
不過，網友cy36hk則認為尾市由高位回落再挾上，明顯反映好友佔大多數，下跌幾十點都能倒升，證明大市應該有力再上。
而網友KCR697覺得大戶可能想換馬，沽出中移動轉買地產股，揚言大戶隨意操控升跌，毋須消息同理由，散戶亦冇能力反抗。至於港股未來走勢，就要視乎美股表現，可能今日會嚟個反高潮，先跌後升，咁就可以挾死更多淡友。