有「台版彭美拉」之稱嘅陳瑀涵，喺06亞姐賽事中大熱倒灶，其實早喺賽前本報已率先踢爆佢胸部突變，由04年選港都小姐時嘅平胸驚變硬如椰殼嘅34D巨胸，之後仲傳佢眼、耳、鼻都經過修葺工程。雖然陳瑀涵輸咗，但冇銜頭都贏風頭，令佢知名度激增。
鄰居指五官整形
已返台灣老家嘅陳瑀涵，繼續修讀文化大學中國戲劇系嘅課程，噚日佢着性感bratop同另一位台灣區落選亞姐李美珍會見當地傳媒。對於自己嘅上圍被形容為「石頭胸」、「籃球胸」，更被拍得肚臍有傷口嘅相，令人懷疑係隆胸後留低嘅手術痕迹，陳瑀涵竟然辯稱係肚臍污迹，仲話家陣每日都用棉花棒捽亁淨肚臍窿。陳小姐連咁唔成理由嘅理由都講得出口，唔通胸大真係冇腦？
近日有自稱係陳瑀涵位於高雄寓所嘅鄰居讀者爆料，話佢五官曾經整形，陳瑀涵就解釋話佢確係喺高雄鳳山出世，但一個月大嗰陣已搬去台北，之後再冇返過高雄，所以傳聞唔成立。佢仲自爆試過俾人話佢曾經生育，但陳瑀涵話自己連跳蚤都生唔出，又點可能有細路喎？
雖然傳聞滿天飛，陳瑀涵都承認重返校園後承受好多奇異眼光，好彩父母對佢好支持，仲日日上亞姐網站同針對個女嘅網友「開片」㖭。
轟亞姐內容空洞
噚日陪陳瑀涵、李美珍見記者嘅，仲有台灣媚婷峰集團董事長莊雅清，佢係今年亞姐台灣區選拔賽嘅贊助商，佢話對亞姐選美過程失望，只係選三圍、選漂亮，內容空洞，但亞視宣傳部發言人就反擊：「佢講嘢要小心啲，當晚係好多知名人士同評判選得獎佳麗出嚟，賽果係絕對公平。」