大市氣勢如虹，恒指連續幾日創歷史新高，噚日最高見19161點，升225點；雖然最後得個桔，收市只係升得嗰2點，報18939，散戶開始有啲慌。不過，引起散戶恐慌嘅並唔係完全嚟自大市高開低收，部份係因為一隻重磅股嘅「異常」表現。邊隻？中移動（941）？No啦……查實係和黃（013）！
和黃近呢一年幾，股價表現甚樣衰，舊年8月最高83.05元，當日恒指高位係15455點；事隔一年幾，恒指升咗22.5%（以噚日收市價計），和黃就倒跌15%，一來一回，上咗車嘅散戶，如果賴死唔走，肯定輸到嘔。
隻股已經被一啲散戶標籤為「藍燈籠」，股價一有「異常」升幅，即刻令大家好緊張。噚日隻股忽然發力，升咗75仙，收報70.60元（見圖），唔少網民都聯想到大調整將至。
升到呢隻 調整還會遠嗎
喺《香港一路發論壇》入面，網友「花子」噚日中午收市前問：「和黃都升埋，調整還會遠嗎？」不過佢又懷疑：「會唔會又係大戶陷阱，13號就照升，但個市就偏唔跌，散戶又一次估錯。」
German就建議大家買Put。
「牛頭角順叔」嘅主觀願望係：「仲未啩，我的二三線股都未升。」
喺另一網站《XocatII討論區》內，網友leoxi亦懷疑，和黃升穿70蚊，係唔表示恒指大升浪已屆尾聲？
和黃係唔係藍燈籠，大家都係估估吓，如果純睇走勢圖，隻股其實有翻生迹象，噚日以大成交裂口爆上，升穿咗短期降軌，短期69.50至70元之間有支持；後市一旦突破噚日高位71.45元，下一目標睇75蚊，短炒嘅跌穿68.80元要止蝕。
余文