白花油王子顏福偉，同大慶石化進軍牡丹江市煤化項目有乜關係？答案：一啲關係都冇，顏公子唔係人哋嘅董事，又冇諗住去東北發展。
佢仲同華華講，雖然之前諗過返中山搵地設藥油廠，但最尾都放棄，3年內都唔會再提，因為喺香港生產始終有品牌優勢，賣埠都馨香啲，好似廣州嘅張敬軒都話係香港歌手咁囉。
至於今次佢咁「錯蕩」嚟人哋嘅簽約會，只係PR姐姐叫到，分享吓喺內地營商嘅經驗，佢上台用勻兩文三語，直認話只係到過黑龍江旅遊咁大把，但好記得嗰邊並唔似香港咁受華南工業污染，仍可享受藍天白雲bluebluesky，當地食嘢大碗又好味，畀佢一個好好嘅印象。
顏公子又話，東北人平均賺得500至800幾蚊人仔，自己着緊幾百蚊嘅波鞋，班工人可能只賺得1蚊半蚊。佢突然有感而發話，東北人睇起嚟好豪邁，實際好純樸，企業家應帶頭做啲公平嘅貿易，投資之餘亦唔應該污染當地人嘅心靈，即係應該對員工好啲，提供好嘅宿舍同膳食，自然會忠心耿耿為公司服務。
呢番咁感性嘅呼籲，唔講仲以為係職工盟李卓人上身㖭！