屯門有個櫃員機好奸茅，20元鈔票扮晒100元，累到提款人白蝕80元。網友「beloved」在BeautyExchange討論區公開投訴，她自稱在屯門市中心的東亞銀行櫃員機提款500元，卻只嘔了四張100元和一張20元，總值只得420元。
嬲到暈的「beloved」表示，事發於星期日中午，她用的是中銀卡，於是致電中銀，職員着她親自前往分行填表。「beloved」已打定輸數：「銀行鼓勵市民用網上服務，點解呢啲嘢又要去分行呢？人人都忙於返工，邊有時間去銀行搞呀？我諗我嗰$80都見財化水，因為張Receipt（收據）係打住$500。」
「張$500對摺出嚟」
一眾BE姊妹都替「beloved」深感不值，其中「車厘@天」更表示有過同類遭遇：「我之前都試過喺北京道1號嗰個荷蘭銀行櫃員機㩒$1,300，但係佢出咗1張$500紙、3張$100紙。張$500重要係對摺出嚟㗎！咁我即係得$800，少咗$500。」後來「車厘@天」成功向有關的銀行職員追討，但仍須花了一星期，才追回500元。
她說：「原來所有冇分行的櫃員機都係要等ATM公司嗰邊check機，銀行係唔負責的，如果你俾佢食咗錢，就要去銀行度填form，再等ATMcheck數先可以決定畀番錢你定係點。」
本報致電東亞銀行，發言人表示，該行一經收到有關客戶的詳細資料，就會配合銀通方面展開調查，追蹤當日提款機的紀錄，若真有其事，將賠償損失。中銀集團發言人也表示會翻查紀錄，但她以非常堅定的語氣斷言：「冇可能出到廿蚊，因為我哋唔會入廿蚊落櫃員機度。」據報道，去年9月，元朗教育路一間銀行也發生過同類事件，一名女子提取1,000元，櫃員機卻嘔出九張100元及一張20元鈔票。
