香港自從引入咗季度公布業績呢個制度之後，投資者可以唔使等半年先知公司業績，透明度高咗好多，但係暫時並唔係強制公司披露季度成績表，肯公布嘅，只係個別透明度較高嘅公司。
季度業績衍生埋季度股息，好似大笨象滙控（005）就剛宣布派發第3期股息每股0.15美元。股東1年收4次息，照計應該開心過1年只收得2次，唔使望到頸都長埋。派得季度息，一般只係例牌嗰幾間大銀行同公用股，但係噚日竟然有間創業板公司時富金融（8122）宣布派季度息每股3仙，都算少見。
時富金融派息率超高
時富金融日前公布嘅首3季業績，營業額2.63億元，較上年同期增69%，純利3305萬元，增長129%，表面增長唔錯。分類業績以金融服務收費及佣金增長較理想，第3季收入6407萬元，增長65%，另外去年開始搞嘅網上遊戲《海盜王Online》等網遊業務提供400幾萬收入。總計每股盈利係2.4仙，但係就派成3仙息，因為淨現金有1.47億銀，相對4.4億銀市值算係高，派番畀股東都好合理。呢個派季度息風氣，值得鼓勵。
噚日見唔少多年無炒過嘅冷門股忽然上升幅榜，其中1隻係生產便服與泳裝嘅工業股德發集團（928），升咗約1成，呢隻股票喺10月份不知不覺已經由0.80元升至1元，噚日一度再升近1.20元，據講又係因為佢喺越南設廠，不過舊年公司業績倒退，且當地經濟好轉，或會搶高勞工及其他生產成本，未必可以受惠。
歐陽風