有一百萬，你會買車、買樓、定係買嚿白松露菌？上年麗嘉酒店於全球3個地區同步拍賣超過1公斤重嘅白松露菌，買家以95萬投得巨菌，今個月12日再次舉行拍賣，預計將以過百萬成交。無份參與唔緊要，你一樣可以走入酒店嘅意大利餐廳「Toscana」食白松露菌，係咪好味我唔敢保證，因為濃烈味道唔係人人都接受，有人話其氣味似汽油、蒜頭或鹹魚，非筆墨所能形容，𠵱家只需幾百蚊就食到，不如自己去試啦！
記者：黃若茵
攝影：譚盈傑、陳陶鈞
模特兒：Ling
切片食最香
「Toscana」由13年前開業起，每年都在大廚Bombana帶領之下，創作不同嘅白松露菌菜式，Bombana話：「我哋每年嘅白松露菌菜式都唔會重複，主要Keep住傳統食法之餘，加點有新意嘅配搭。好似雞蛋就係最傳統、最常見跟白松露菌配搭嘅食物，但就可以有多種不同嘅形式去做。」此外，Bombana話白松露菌跟Creamy食物配搭最好，因為有助發揮白松露菌香味，而菌本身不宜熱食，通常切薄片放於食物上生食，確保其香氣濃郁。而白松露菌由掘起計，存放時間只限10日左右，所以Toscana每星期需由意大利出產最靚白松露菌嘅地區Alba入貨兩次，每次貨量只約2公斤，保證食得新鮮。
點解咁矜貴？
早於古羅馬時期，白松露菌已被認為有催情作用，更一度被教廷列為禁品，羅馬貴族亦將之視為貢品。連英國詩人拜倫也喜愛於書枱上放一顆白松露菌，話有啓發靈感嘅效用。至於出產地區，已證實只有意大利中部、北部同埋斯洛文尼亞，其中8成嚟自意大利北部Piedmont嘅Alba，主要依附喺橡樹、檸檬樹、柳樹、櫸樹等樹下40厘米以下嘅泥土內，一般約重30至40克。由於只可野生，不能人工培植，所以特別昂貴，係現時最貴價嘅菌類。10月開始係採摘嘅高峯期，只有有牌獵人才可進入產區採摘。以前獵人出動都會帶埋母豬幫手，據說因為白松露菌氣味似豬公，後來因為母豬每次發現白松露菌後，都會吞咗落肚，所以𠵱家已改用犬隻。在法國，據聞也有人用另外一種古老的怪方法去找松露，叫做aveclamouche（withthefly），即係用蒼蠅搵白松露！
白松露菌配芝士菠菜意大利雲吞$460
一般嘅意大利雲吞賣百多元，但Bombana話雞蛋同白松露菌係最佳拍檔，所以呢隻大size嘅意大利雲吞裏面加入雞蛋黃，雲吞餡料用意大利軟芝士，啖啖Creamy。
白松露菌配天婦羅小龍蝦$480
選用來自歐洲嘅小龍蝦，以薯仔薄片包住做天婦羅，咬落薄脆。白松露菌放喺以杏仁及蒜頭做成嘅汁上，口感輕怡而兩者味道勁配合。
白松露菌伴薏米配意大利野雞$520
揀選意大利野雞雞胸肉，質感特別嫩滑，中間夾雜少許白松露菌碎粒。薏米則煮得十分煙韌，清淡味道更襯托起菌香。
白松露菌配澳洲和牛伴牛肝菌$540
澳洲M7和牛脂肪較少，且咬落腍口易溶。旁邊有一顆小小洋葱，洋葱內釀有鵝肝，賣相趣致。另有烤過嘅牛肝菌，伴住白松露菌一齊食會有雙重菌香。
（上）白松露菌沙巴翁、
（中）白松露菌雪糕
（下）白松露菌布甸$190
沙巴翁以白松露菌、蛋黃及糖一齊打起，再以熱水坐至固體，口感極輕。布甸以栗子味為主，加入一小塊奶油蛋卷Brioche，有鬆軟效果。雪糕味道則感覺清新。
巴閉廚師勁攞獎
要說大廚Bombana為「Toscana」嘅鎮店之寶絕無誇大，Bombana於3年前獲得「全亞洲最佳意大利廚師」獎，今年更得到意大利（海外）廚藝協會（ICIF）選為環球白松露菌大使，曾處理超過數百顆白松露菌。要食白松露菌，點可以唔搵Bombana呀？
你都想加入拍賣？
上年環球白松露菌慈善拍賣情況踴躍，最後由何東後人何美雲以95萬港幣投得，並全數捐贈「母親的抉擇」。而今年白松露菌慈善拍賣將於11月12日舉行，想參與嘅話就要快啲訂枱，每枱11人，價錢為2萬美金。
睇埋裝修
街坊話：100萬買白松露菌，不如買樓！
搵菌攻略
Toscana（25322062）
地址：中環干諾道中3號麗嘉酒店1樓
營業時間：
星期一至六12:00nn-3:00pm、6:00pm-11:00pm
星期日6:00pm-11:00pm
交通：中環地鐵站J3出口
全店座位：70個
人均消費：午市$350，晚市$700
有着數：以滙豐白金卡簽賬惠顧晚市，可獲85折優惠
註：每份白松露菌菜式約有5克白松露菌，另每加1克加$130。