孫柏文因呢排玩得太緊要，患咗感冒，所以噚日食完晏就曠工去睇醫生。點知，正當我喺候診室等醫生，大約下午3時45分嘅時候，電話突然響起收到短訊嘅鈴聲。我當然第一時間睇吓又有邊個靚女send短訊畀我，點知一睇短訊我就「媽」聲四起。原來係我一個男性舊同學send短訊畀我，要我知道恒指由升200點變成倒跌，我睇到呢度就第一時間問自己：「唔係嘛？我啱啱先至同全世界話恒指好快會上2萬點，今次孫柏文仲唔俾人叫做山埃組組長？今次仲唔大鑊嗎？」
我一睇完個短訊就即刻想打電話畀忙於湊女嘅《利字當頭》總舵主利世民兄，問佢發生乜事。點知電話未接通，姑娘已經叫我入去見醫生。入到房，醫生就開始問我關於患病啲嘢，一路問就一路量血壓，點知，佢一睇到我嘅血壓就即刻靜下來。經過無聲嘅片刻，一個足夠令我思量「自己係唔係死得」嘅時間之後，醫生只係問咗句：「你血壓好似好高，係唔係工作有壓力？」本來我想答：「醫生…今晚我開電腦上網，就會見到成千上萬嘅網友話我係山埃組組長，試問點會冇壓力？」
一如澳博送叉燒飯
不過為求可以盡快打電話畀利世民，我答：「醫生…香港哋打工，你話呢？」醫生聽咗我嘅說話之後，就將一個好似啱啱係冰箱攞出來嘅聽筒，壓向我嘅心口，我當堂「精神一振」。經過呢個半SM動作之後，我就乖乖地完成睇醫生嘅程序。跟住就打電話畀利世民。
電話一接通，我都未開聲，利世民就好似見到來電顯示咁，破口大罵：「孫柏文！你知唔知道嗰班想跌市嘅淡友喺度講啲乜？佢哋喺度傳中移動941會配股！搞到個市由升200點差啲變成倒跌。」原來傳配股，唔怪之得個市差啲倒跌。
我第一時間安撫佢話：「今年已經係第8次有人傳中移動會配股，結果最終股價大家都有目共睹。我今日要用番上次形容澳博送叉燒飯，去迎戰永利賭場開幕嘅一句說話，就係今次淡友吹中移動配股去做低個市，SmellslikeDesperation。」
最後，就算中移動真係配股又點？中移動始終都係中資企業，05年9月中石油都係喺公司現金非常充裕嘅情況之下配股，結過9個月之內升咗50%（見表2）。上次配股都照升，今次仲係傳言，唔通中移動真係好快到$80（見表1）？