出席午餐演講會，必要嘅社交禮貌係同坐喺左右、對面嘅不相識嘅人士握手，交換名片，跟住互相交談。題目係圍繞當日演講嘉賓之演講主題。例如出席曾特首施政報告演講會，大家就傾施政報告；出席某經濟學家講中國經濟發展，我哋就講中國……當然亦會就新相識朋友之行業，面對面請教。
左丁山出席午餐演講會，次數多到數不清。經常發覺同鄰座朋友交談，得益多過聽演講嘉賓講行貨。呢日喺午餐會碰見幾位先生，其中一位係做大狀嘅，講起嚟，原來呢位大狀對經濟投資好有認識，左丁山話：「生平最怕公事上搵大狀，唔係告人，就係被人告，兩者皆麻煩。」大狀笑笑口話：「我哋係好討厭嘅人物，打輸官司，實俾客鬧，打贏官司，都會俾客鬧，話我哋嘅律師費太貴。」香港有過千名大狀，照計香港唔係咁多官司打啫，點解一啲大律師收費真係貴得離晒譜？大狀話：「我第一個學位係讀經濟學，可以話畀你聽，大律師市場並非公開競爭，收費透明度好低，一啲大官司發生前，原告被告雙方齊齊去搵著名大狀，要佢哋報價，其實香港唔係咁多金牌大狀嘅啫，香港咁細，你識我時我識你，大家bid乜嘢價，心知肚明，梗係唔會低嘅啦！」咦，呢樣有可能係pricefixing（定價）喎，有人極力鼓吹公平競爭法立例，呢樣係唔啱嘅，公平競爭法他日如何應用於大律師行業？
大狀話：「冇得應用，大律師係個體戶，成千人嘅市場，你點去證明兩三個人有marketdominance（控制大部份市場）呀？你估係電力市場只得兩個廠商咩！既然冇人可以主導市場，就好難推斷任何兩人秘密定價係違反市場競爭。」真係唔夠大狀講！大律師呢個行業收費好特別，全無準則，最高與最低收費可以相差一百倍，左丁山同大狀講：「你讀完經濟再讀法律，不如寫本書分析香港大律師市場嘅結構分析。」大狀話：「我唔想做神枱貓屎。」