開鑼前聯盟宣布今季唔再容忍球員被吹罰後向球證發囉嗦（又稱「華萊士條例」），唔信？開鑼未夠一個禮拜已經有3名球員：丹佛前鋒安東尼、活塞前鋒華萊士同帝王後衞碧比，喺球證面前衰口多，結果被踢出場。
此外，熱火嘅獲廸、山貓新人摩利臣同76人後衞艾華遜等多位球員，都因為觸犯此例被吹罰技術犯規。連太陽班主沙華因為對球證出言不遜，被罰咗成25,000美金（近20萬港元），睇嚟聯盟真係要殺一儆百！
華萊士斥擺明歧視
唔怪得「茅躉王」華萊士怒斥：「呢條簡直係歧視條例，專針對好似我呢啲被列入黑名單嘅球員。」
不過令到班球員最㷫嘅係，呢條新例毫無準則可言，吹唔吹罰視乎球證個人喜好同心情，獲廸就指出：「喺比賽期間球員都情緒高漲，向球證發吓囉嗦係人之常情，但係到底幾時算係過火？幾時應該收聲？完全令人無所適從。」「閃電」呢番肺腑之言不無道理，你又點睇呢？