由田北俊家族持有一半單位收租嘅淺水灣道63號ManhattanTower，啱啱錄得近半年嚟首宗成交，呎價創新高，利嘉閣陳詠嫻話，高層A室，2243呎，由外籍客以3880萬買入，呎價17298，單位連租約，月租7.2萬，租金回報率只有2.2厘。原業主都係外籍人，99年6月以1950萬買入，勁賺1930萬。
ManhattanTower雖然已有差唔多30年樓齡，不過造價仍好硬淨，除咗面向深水灣，景靚之餘，最主要係盤源極少，只有19個單位賣散咗，成日都冇盤放，想住嘅話，惟有向大業主租，月租約10萬蚊，估計田北俊家族年收租金超過二千幾萬。呢幢樓，曾經有唔少名人住過㗎，好似田少個女田啓安，婚後就搬咗入嚟，另外鄭裕玲、朱玲玲家姐等都住過。