香港測量師學會嘅「十大樓盤頒獎典禮」，今年已經係第3屆，大會噚日喺銅鑼灣搞咗個「分豬肉」頒獎典禮，場面都算幾熱鬧，大發展商包括長實、新地、恒地、信和及新世界同埋會德豐地產都有派代表出席。
新地尖沙嘴凱旋門可以話係今屆嘅大贏家，分別囊括「2006年最佳市場推廣大獎」及「2006年最佳樓則大獎」。呢個所謂最佳市場推廣大獎，相信係指邊個最多新聞，曝光率最高嘅樓盤，個盤舊年以1.68億賣出嘅「天際獨立屋」，呎價3萬幾，打破本港豪宅呎價紀錄，更惹起造市疑雲，上晒新聞頭條，頒呢個獎畀佢可以話實至名歸。
長實嘅大坑名門，大會就頒個「2006年最佳樓書大獎」，長實話用咗成二千萬整本樓書，樓書都有幾個版本，查實大會應該諗吓頒個「最貴樓書」大獎畀佢。
近年發展商賣樓愈來愈多花臣，無論係樓書定宣傳，日日新鮮，今屆參賽同攞獎嘅樓盤，多數係豪宅，包括大角嘴一號銀海、九龍塘畢架山峰、上環聚賢居同名門，豪宅果然注重包裝。
電郵地址：[email protected]
