前晚約咗Samantha、Charlotte去打邊爐。我哋幾個鍾意食菜，Samantha就係咁喺度淥牛肉、豬肉片咁，作風豪放嘅佢，食到整濕件小背心都唔理。食到最後，Samantha突然𢳂啲湯底去個碗，然後雪一聲飲咗。我睇到眼都凸埋，但Charlotte笑笑口話：「我阿媽都有講，打完邊爐飲咗啲湯，無咁熱氣。」Samantha就話佢識嘢，我就唔多信。
中醫師關之義後來同我講，好多人以為打邊爐嘅時候，因為放咗唔少菜落去，包括蘿蔔呢類清熱嘅蔬果，所以飲咗邊爐湯底，可以清熱氣。佢話呢個說法係錯嘅，因為清熱嘅蔬菜，例如西洋菜之類，好多時候唔應該煲太耐，半個鐘度就得，煲太耐反而會失去咗清熱作用。
佢仲話，廣東人打邊爐鍾意食好多肉，肉碎跌咗入湯底，仲不斷加熱，反而令啲湯好燥，仲飲埋啲湯，燥上加燥。佢話如果唔想咁熱氣，打邊爐時應盡量用清湯底，唔好食咁多肉類，多食蔬菜。:p
我會唔會同Samantha講？會，遲啲先，等佢生咗幾粒暗瘡先啦，哈。;D
逢周一至周四刊出