美國中期選舉前夕，華爾街股市扭轉跌勢，顯著造好，炒上嘅藉口梗係同選舉冇關啦，因為共和黨喺民調中落後，不過，要抽高個市並唔難，美股大形勢向好，只要有錢，搵個藉口就可以炒，前晚話啲收購合併好正面，咁美股就炒咗上去嘞。
中期選舉嘅結果唔會係港股股民所關心嘅，但係美國人就好關心，政治呢樣嘢同商業利益黐到實一實，美股自然會受結果影響，作為一個國際金融中心嘅投資者，大家其實都要留意吓，因為美股有乜風吹草動，港股都會借勢出現波動。
美股造好，本地銀行又減息，恒指一舉突破19000關，昨日喺滙控（005）、中移動（941）同地產股帶動之下，恒指大部份時間都企喺高水平，收市前半個鐘，情況出現咗變化，啲沽盤「倒水而出」，恒指反升為跌，不過，轉過頭又升返上去，相信唔少散戶嘅好倉都被震咗出嚟，股市就係咁，經常會有啲驚奇畀你，喺「貪婪同恐懼」之間掙扎，就係股民所謂嘅「刺激」。
恒指收市升咗2點，個市應該點睇，真係考起好多專家，不過，個市有成517億元成交，暫時都應該係大漲小回嘅格局。
國壽C輪2183：隻國壽（2628）昨日一度升破17元，但係高位有啲猶豫，轉為橫行，尾段隨大市回落，報收16.70元，睇落有啲曳，不過大形勢其實冇變，稍為整固一吓，應該會炒返上17元，破位睇18元樓上。國壽C輪2183昨日收1.34元，槓桿率12.5倍（有效6.8倍），對沖值0.54，引伸波幅31.5%，輕微價外，正股轉入價內，上升潛力增大，正股升上18元，2183應該唔會低過2.10元，呢個價買入，正股跌穿16.30元止蝕。
俊樺