𠵱家啲商場愈嚟愈早做節日宣傳，好似新地旗下嘅柴灣新翠商場，𠵱家仲係11月頭，聖誕老人已經出動，仲有靚靚聖誕女郎同小朋友一齊玩雪㖭，吸引咗唔少人圍觀。
喺12月，呢度將會大變身，聖誕樹、聖誕熊呢啲一定唔少得啦，仲會每個鐘頭噴一次真雪，小朋友應該會好興奮喇。話時話，新翠商場自從大裝修之後，擺脫咗屋邨商場格局，仲加咗唔少年輕人鍾意行嘅店舖，怪唔之得人流都旺哂。
新地租務部總經理馮秀炎話，個場今年頭10個月人流有3600萬，比上年同期多咗13%；營業額成3.8億咁多，增長14%，喺柴灣呢啲工業區嚟講，都算唔嘢少。
佢話，今年特登用白色聖誕呢個主題，希望12月可以吸引到490萬人嚟行，做到4000萬生意就最好嘞。