粉嶺聯和墟「合發」嘅鹹菜雞飯早就響朵，如果你人生路不熟，就要小心提防假冒，鄧太太話：「試過有客人問隔籬附近食檔，邊度有鹹菜雞飯食，佢哋會冒認或者點客人去另一邊。」究竟鹹菜雞飯有乜咁巴閉，搞到要冒認咁緊要？「鹹菜同埋雞都係每朝即做，連薑葱油都係每朝即炒。我哋凌晨3點就開檔，老公負責炒鹹菜，我就蒸雞做燒味。」雞不像一般食肆以浸煮方法做，而採用蒸嘅方法，可防止肉汁流失到水中，保持肉汁鮮味。
鹹菜雞飯係鄧先生兩公婆自創，有呢個諗頭全因鄧太勁愛食雞，「以前檔口喺天光墟入面，只做飲品麵包等，嗰時老公每日都會買盒雞飯畀我。後來發覺好多送貨工人都想食飯，咪做咗鹹菜雞飯出嚟囉！我每朝都要食呢個飯，老公炒嘅鹹菜特別好味！」檔口開咗28年，𠵱家雖已搬遷到街市上嘅熟食中心，風味不及從前，但生意依舊。你都想試？要趁早呀，鄧太每日只賣十多隻雞，鹹菜雞飯每日賣晒就無，最穩陣係午市時間去食。食飯仲送多碗每朝即煲，天然入味嘅家常例湯，無得彈！
記者：黃若茵
攝影：譚盈傑
鹹菜雞飯每碗$18每碟$21
雞肉嘅嫩滑程度簡直無得彈，夾埋帶甜味爽口嘅鹹菜食，就多份刺激感。
薯仔燜豬肉每碗$21每碟$23
以南乳、老抽玫瑰露等燜煮，肥瘦相間嘅豬肉帶香濃南乳味，肉感腍。
醬爆牛肉$30
「合發」另有小炒廚師，醬爆牛肉主要以豆瓣醬調味，辣得嚟更香口。
合發燒臘美食（26755105）
地址：粉嶺聯和墟街巿熟食中心19號檔