社保基金理事長項懷誠近日接受中央電視台訪問時，竟然話自己係金魚！好好哋一個理事長，點解變成金魚佬？原來記者問佢，假如財政部要撥筆錢充實社保基金，佢想要幾多？幽默嘅佢就話自己係條金魚，咁你明啦。
項金魚話，以前響稅務局做，先知道收錢難；轉去財政部負責分錢，知道分錢亦好難；如今被派去管一筆巨款，至知原來管錢一樣大有學問。佢話成日有老友向佢推介投資項目，但佢手上筆錢係老百姓嘅養命錢，唔可以亂使，亦唔係佢話事，要做可行性研究畀理事會提意見，再由包括風險控制在內嘅三個非常設機構書面認可，至可以再攞畀理事會討論。
唔怪得人哋話項懷誠身體唔多好，人哋搵佢要錢，佢經常聽唔見；人哋畀錢佢，佢耳仔就會好靈敏，而項金魚條頸亦唔係好掂，只曉得搖頭唔曉得點頭喎。