十個女仔，十個要靚，不過現在社會已形成一種不健康的風氣，個個人都認為瘦即是美，唔食Lunch唔食飯司空見慣，搞到個個人都面青口唇白，加上每月梗有幾日心情暴躁皮膚差，就算買幾多胭脂粉底都補唔番。要靚得健康，最緊要食得滋陰又滋補，唔識自己煮？去「姿」實搞得掂！
記者︰方綺君
攝影︰陳陶鈞
Model︰Mavis
專服侍女士們
「姿」，取GforGirl，G的諧音，店舖名字無論睇落同聽落都好Feminine，非常切合店中以女性為目標的主題。店中負責人周生話︰「發覺好多女士都注重自己嘅外貌，成日減肥唔食嘢，其實人要靚，最緊要都係身體入面調理得宜，呢樣唔食嗰樣唔食，邊度有足夠營養呀！」十個女士十個要靚，不過好多女士不是工作太忙，就是唔識自己整嘢食補身，所以周生同朋友就決定開一間為天下女士提供扮靚食療秘方嘅舖頭，周生仲好抵死咁響《鳳求凰，琴歌》詩中一句「有美人兮，見之不忘，一日不見兮，思之如狂。」起首加個「姿」字，變成「姿有美人兮」印響卡片上。
份量成份有醫師教路
店內餐牌會列明食品的效用和功效，燉湯和糖水全部燉5至6小時，大多有補元氣、補血的功效。周生話︰「我哋唔係亂咁作㗎，全部都係由一位中醫朋友度身訂做，有晒配方同份量。」所有滋陰滋補湯水，周生都會搵身邊女性朋友做試驗品睇睇功效！店中就以糖水同山藥果汁最受歡迎，可以補充體力又唔怕肥，$450飲十次的鹿茸補血湯都十分抵，女士們一個月梗有幾日唔方便兼感到沾寒沾凍，補一補最好。
山藥即淮山，滋潤、健脾開胃，周生話在《神農本草經》內山藥獲列入上品，而烤焗過的糙米再煮，可以降低澱粉的含量，補充唔鍾意食飯的女士的澱粉質。入口味道同平時飲果汁一樣，唔會似飲藥咁難入口。
黑豆烏雞粥$32
黑豆先要浸兩至三天，之後再落獲炒香，和烏雞白米同煮會帶出黑豆的香味，粥入口軟綿，食完滋陰益腎，仲有美髮、明目、活血等功效，工夫咁多一碗都係賣$32，價錢合理。
靈芝雞$46
靈芝雞只在午市供應，包括飯及一個餸，食得飽之餘仲有一個補身、補腎又強壯身體的靈芝雞湯，秋涼最啱食。
蓮子雪耳參鬚糖水$28
人參燥，唔係每個人都適合食，所以周生話要改用參鬚，效果亦不俗，兼不容易上火，加入雪耳有滋潤作用。
合桃無花果蜜棗糖水$23
合桃本身有一陣油味，周生話要先用滾水淥一淥。無花果含豐富抗氧化物質，每日食可以美白皮膚。
雪餅$28/3粒
樣子的骰趣致，望落似雪米滋，咬落煙煙韌韌似冰皮，餡料有紅豆蓮茸，下午茶叫番一兩件送茶就Fit晒。
生果蒟蒻$26/2件
屬最新出品，蒟蒻人人都知健康，再加入雪耳和生果，有𡁻口之餘，最緊要有滋補功效。
睇埋環境
女士都話要試
補身攻略
姿（29600606）
地址︰鰂魚涌海灣街29號地下
營業時間︰11:00am-11:00pm
座位︰約50個
交通︰鰂魚涌地鐵站B出口經行人天橋到地面，再步行約3分鐘。
人均消費︰$30-$50