港股直衝向19000大關，恒指噚日最高見18940，收18936，大升186點，上升股（唔計認股證）就有410多隻。恒指升勢仍係由中移動（941）帶動，呢一個亁坤大挪移，竟然有10級颱風嘅威力，把淡友吹到片甲不留。
大市升得速，回頭亦會跌得好急，好友切勿勝利沖昏了頭腦，大市隨時會掉頭回落，雖然只係調整，但由於累積升幅大，調整嘅幅度亦唔會細，小心！不過，由於牛市已成型，整固期間，仍會有好多股仔接力而上，特別係家吓有唔少公司正搞緊大動作，若果能成事，呢類股份隨時會爆炸上升。
今日先講雅域集團（1229），呢隻股票已經靜咗好耐，噚日就突然有異動，午後掃到上1.16元，收1.15元，大升13仙，升幅12.7%，成交亦大增到1320萬股。股價表現咁勁，必然有料到，消息話幕後人呢輪頻頻同猛人密斟，聽聞雙方已達成共識，發展大計一落實，成間公司就會脫胎換骨。
6月中開始，雅域股價基本上係在1元至1.20元間橫行，噚日一支大陽燭抽上去，已一舉而升破4條平均線，且去到長期下降軌1.16元的阻力水平，今日若能破位而上，則中期調整確認完成，開展大升浪，第一個目標，係5月中高位1.52元。
中期調整快完成
炒消息股，回報大，風險亦大，先訂立止蝕位，若然對辦，則一定要上移止賺位，繼續持有，務求可以食到大茶飯。明天再講另一隻搵食股。
講吓啲開心嘢，大半個月前，推介確利達（1224），當時股價0.385元，上禮拜開始發力，噚日升勢轉急，一度掃到上0.465元，收0.455元，升4仙，升幅9.6%，成交更大增到6170多萬股，公司股東大會通過收購大計同配股，股價亦正式開車。
確利達噚日一支大陽燭，創出4年來新高，照度上去，短線目標0.52元，中線可見0.80元。
郭兆誠