北京首都機場（694）9月底配售2億股H股，配售價5.10元。自消息公布後，首機股價一直冇運行，配股價幾度失守，上星期最低跌到4.94元，噚日收報5.15元，升4仙，網上又見散戶議論紛紛。
《香港討論區》裏，網友StockBB發現：「694上星期跌落4.9x後，即刻有人爭住買，今日佢個股價已經上番5.16，相信會再發力挑戰高位……可以再買，因為仲有水位，我諗好快會見5.3。」
投資王都對呢隻股有信心：「相信4.96已見底，成為重要的支持區，睇嚟此股已擺脫弱勢。今日整日見吸納，買入風險不大。中線可買入。」
TTboy2004亦係大好友：「上星期啲大行唱衰佢時，高盛喺$5左右入咗好多貨，睇嚟真係見底，我樂觀啲睇，08年前上$7唔奇！」
多家大行齊唱淡
自配股事件後，花旗、美林同高盛等大行先後走出嚟唱淡，主要都係擔心未來資本開支過大，或者增發新股，短期難免攤薄未來盈利。惟獨負責配股嘅瑞銀比較畀面，指集團擬增資本開支提升現有設施嘅處理量，相信未來年均乘客處理能力可提升至5400萬人次。
睇基本因素，首都機場一啲都唔弱。北京商務同旅遊需求強勁，集團新航站區擴建已於2004年動工，全部工程預計明年底完成，08年啓用，啱啱好趕到北京奧運班車。而且中國民航總局正檢討機場收費，如果落實，可令集團盈利增加10%至15%。
技術上，隻股噚日升至近期平衡通道降軌時受阻回落，現價欠值博率，阻力位5.25元如果升唔穿，唔好對佢有太大期望。短期下降軌支持位大約4.90元，有耐性嘅話，等見4.95元至買，博佢升穿5.25元後挑戰5.50元，但跌穿4.80元就要止蝕。
余文