做Sales難免會遇到搞笑事，最慘係喺客面前要死忍爛忍！笑個客搞禍單生意，份工都冇埋呀！不過有啲嘢忍住唔發洩出嚟好辛苦，所以呢個欄就專俾靚女Sales公開鮮為人知嘅搞笑秘密，等個客幫襯完先笑餐飽，冇仇報！
喺銅鑼灣返緊工，有少少MaggieQFeel嘅Ivy就遇到一個「自由人」買數碼相架，佢一副暴發戶口吻加捲舌口音話：「拿幾款電子相架來看看！」仲專業到自己帶備記憶卡嚟試機㖭。插入張卡一開機……咦？香港有溫泉浸咩？乜日本女優松島楓嚟咗咩？原來係國內朋友珍藏喺張卡裏頭嘅鹹相，裸女趴咗喺地3點盡露咬晒手指，Ivy當時卻唔覺尷尬，只係「嘩！」一聲兼勁忍笑，此時「自由人」已經大叫：「停！記憶卡還給我！」此一喝令其他Sales望埋嚟，呢個時候個相架已經轉咗做另一張，今次仲有女優典床典蓆㖭！
之後呢位年約30歲、着西裝嚟旅行嘅國內同胞面紅耳赤冇幫襯就走咗，難為Ivy忍晒笑扮冇嘢都做唔成單生意。唉！其實幾個朋友去旅行口淡淡，帶備鹹相看門口都無可厚非，使乜咁發脾氣掉頭走？唔通佢嬲香港嘅AV舖冇AV賣？
