早排二佬郭炳江講過，新地要努力做有良心嘅企業，唔可以行差踏錯，辜負老竇同世叔伯打番嚟嘅穩健基業。做得好事多，又再一次揚名海外。國際財經雜誌《Euromoney》早排搞咗個「2006亞洲最佳公司」選舉，用問卷訪問咗各地嘅賓架同芬佬，叫佢哋秤吓230間企業嘅實力。
結果，新地喺亞洲區攞到「最佳地產商」、「管理層最易搵到」、「網站最實用同資訊最豐富」嘅殊榮；即使喺香港亦都一樣最巴閉，攞埋「最佳公司」、「盤數最高透明度」、「業務策略最可信同最統一」嘅冠軍。
如果計埋9月份由同一本雜誌搞、搵地產經紀投票而攞嘅兩個冠軍，新地就更加威足全城，咁開心，難怪今次三佬郭炳聯親自出馬去領獎！