世貿組織將於今日在日內瓦召開特別會議，表決是否讓越南加入成為第150個成員國。經過十多年談判，相信正式通過唔成問題，而且趕及本月18日亞太經合會議前通過，有特別意義，到時東道主越南可以趁機同中國及美國等國家元首進一步傾貿易合作。
上月底推介過陸氏實業（366），股價升勢凌厲，說這是唯一越南熱受惠股，是有根據的，因為陸氏剛大規模投資市中心商業地皮，落成時，正是大量外資機構設立總部之時，而目前當地商用物業仍供不應求。另外，加入世貿後進口美國關稅大減，外商將爭相喺越南設廠，第一時間需要嘅係水泥，陸氏適值大量擴充當地水泥產能。
至於噚日「激」升21%嘅激成投資（184），所謂越南概念只係當地兩間酒店，未來或可受惠房租上升，但升值之說，對不起，根據國際會計準則，酒店升值也不可以重估，反而每年要作出折舊。
那麼陸氏豈不是忽然時來運到？不是的，10年前陸氏投資當地水泥業曾令公司「泥足深陷」，負債高企，被迫要出售國內電視機業務，殊不知幾經波折變成與TCL國際（1070，現稱TCL多媒體）合併，持有1億股TCL，2000年股價7.55元無沽到，反而跌至01年中低位1.3元先至沽，到沽清時又因TCL收購Thomson，眼白白睇住股價大升至近4蚊。
陸氏喺1元水平橫行足8年，今次升浪，補番晒多年升幅。越南政府上半年大換班後，大把動作，呢個越南熱，剛開始而已。
歐陽風