大道中置地廣場內嘅約克大廈落成啓用，樓下開咗一間Gucci旗艦店，晚上開燈後光耀奪目，成條街都靚晒。以前置地廣場大道中一邊比較靜，𠵱家唔同晒咯，一字排開，有Gucci、有置地文華、有HarveyNichols，兼夾文華外可停的士，於是帶旺晒。有錢外國遊客，特別係啲闊太與千金，畀得起最少三千五百蚊一晚房租，來港目的為購物嘅話，住響置地文華，最為方便，所有名店都喺酒店隔籬左右，即使出面落傾盆大雨都唔使擔遮出門，買到手軟為止─其實唔會手軟，因為咁近，簽上卡就叫人送貨到酒店可也。
約克大廈正門行入啲，有一間左丁山唔識，女士好識嘅「名牌」手袋店，媒體營業總監靚女W呢日請左丁山到「賀菊」食日本魚生，講到名牌手袋店開張，不知幾興奮，左丁山就唔知佢講乜。靚女W話：「你背啲喎！」於是食飯之後，特別帶左丁山去約克大廈地下裝吓，果然有間V字牌手袋店，好多白色手袋擺在櫥窗內，左丁山話：「冇乜特別吖！」靚女W話：「聽講係手造㗎，隻隻手袋最平都要一萬幾千，白色手袋最出名，六七萬銀一件嗰啲已經俾人預訂晒！」喺中環購物，實在唔明白香港點解仲有貧民區，點會有人要攞綜援。
V字牌手袋店話係米蘭名店，徇眾要求，來港設零售店咁講。與靚女W望吓望吓，突然見到店內有攝影記者舉起相機，左丁山連忙彈開，記者行出嚟嗌聲：「左生，唔係影你呀！」望真啲，乃昔日下屬，咁都冇咁驚。昔日左丁山請佢做攝影助理，跟師傅A擔遮打燈光，如今佢已成為高級攝影師，有人跟佢擔遮打燈。置地廣場名店附近，經常有記者埋伏，專影啲名女士、名公子，啲名人防不勝防㗎。做名人其實都幾煩，去到邊都俾人望住，冇乜自由。好似呢晚在Joyce店外等的士，好多行人望實一位好高嘅靚女走過，聽到一位女士講：「梁安琪乜真係咁高㗎！」梁安琪唔知有冇籠裏雀嘅感覺呢。