八卦風：Mercedes-BenzS600Guard防彈防爆啱首富用

唔少高官貴人、有錢富豪都會怕自己喺車程中受人襲擊、搶劫、甚至綁架，所以佢哋都會好樂意買部有齊防彈防爆功能嘅汽車代步，而且選擇仲好多㖭！就好似德國嘅Mercedes-Benz為例，最近又幫旗下新款S-Class，推出保護級數達B6/B7嘅S600Guard；單從外觀根本無可能辨認出佢係一部防彈車，但查實佢內外都具有多項保護乘客嘅功能，坐喺入面嘅人完全唔使怕有人會向佢發動襲擊。
記者：鄭達基

強化底盤

新款Mercedes-BenzS600Guard，係以一部擁有長達3,165mm軸距嘅長陣版S600L改裝而成，車身內外都經過強化，其中底盤同車架之間嘅連接經過加焊，堅硬程度比原來嘅高好多，前輪制動系統都改用咗雙卡鉗設計，令制動效能更強；輪胎就用Michelin嘅Run-flat型號，遇上爆胎嘅情況下，仍可行走一段路程，逃避敵人。

■單從外觀而言，全新S600Guard跟普通版本無太大分別。

■車窗都被加厚，備有防彈功能，出廠前會經廠方作精密測試。

有滅火設備

新車不但車身及車窗皆被加硬及加厚，從而達致防火及防爆嘅功效。另外，用家又可選配引擎滅火系統、緊急尾冚開關鍵、特製防爆油缸等等，但最吸引都係屬Optional配備嘅緊急新鮮空氣系統，當遇上受到毒氣襲擊時，可阻擋有毒氣體入侵，令車內人士可輕鬆逃脫。

■加厚車門用精鋼製造，有更好防撞及防爆。

■可額外加裝緊急新鮮空氣系統，避免受毒氣襲擊。