外圍股市氣氛麻麻，昨日港股開得好保守，但係就冇乜沽壓，啲大藍籌冇動靜，啲錢就繼續追捧啲國內銀行股，國內銀行股上晒力，睇怕冇咁快掉頭。
個市早段唔郁住，原來大戶先收集，然後施施然炒上，中移動（941）炒高3.3%，報收68.75元，加埋隻滙控（005）高收150.40元，恒指又有近200點進賬，企喺18936收市，19000關破關在即。
寫到呢度，啱啱收到料話滙豐減息，優惠利率調低0.25%，相信其他銀行都會跟，東亞（023）主席李國寶話，𠵱家會跟減0.25%，遲啲會減多0.25%，點解？為咗保持競爭力，喺水浸嘅情況下，冇辦法唔將優惠利率之差異清除，今日個市會點？睇怕最少都有兩三百點升啩。
除咗滙控會帶個市上去，估計啲地產股都會趁機炒上，減息喎！點會冇刺激，再睇吓美國嗰邊，減息周期開始只係時間嘅問題，𠵱家最多人睇明年1月聯儲局就會減息，香港銀行水浸，行先一步，港股可以更樂觀。
中石化C輪2205：今日推介中石化C輪唔係同你講石油，而係講中石化（386）「染藍」做恒指成份股嘅問題，秤吓啲候選股份，中石化機會最大，上個禮拜五喺高位徘徊，成交大增，昨日大成交推上，高收5.64元，周五恒指服務公司公布恒指組合前，中石化有機會上試6元，破位睇6.30元。隻中石化C輪2205昨日收53仙，槓桿率10.6倍（有效6.6倍），對沖值0.61，正股升上6元，2205應該升破75仙，正股升上6.30元，隻C輪應該逼近1元，如果啲基金盤掃得急，引伸波幅上升，隻C輪嘅升幅會擴大，呢個價買番啲，正股跌穿5.40元沽出止蝕。
俊樺