星期日，相信係球迷嘅噩夢！阿仙奴、車路士、AC都輸波。今次小弟認為除車仔較為穩陣外，其餘兩隊都會出事！
今明兩日，英格蘭聯賽盃同意大利盃，我會支持阿仙奴同AC嘅對手！先講阿仙奴，佢哋將會作客對愛華頓，儘管主隊聯賽啱啱輸波，但愛華頓表現實在唔錯，安祖莊臣狀態OK，加埋卡希爾、卡斯利，唔係冇機會贏阿仙奴。反觀兵工廠，近況真係麻麻！近3場波未贏過兼入球開細！我從來唔相信甚麼贏形勢輸波嘅藉口，贏就贏、輸就輸，冇藉口！所以我會博愛華頓主勝！
車仔必以維拉出氣
至於AC，真係冇諗過佢哋態度會咁差，好似已經進入放棄狀態，等緊下屆聯賽開鑼先搏命！所以，我會博AC主場輸波！而車路士，聯賽輸畀熱刺，返到主場，維拉將成為出氣對象！
睇番今晚，我會捧屈福特串利雲特。簡單嚟講，睇完紐卡素嘅賽事，只覺得佢哋真係好差！至於馬體會，唔使多講，一對翼傷咗之後，季初嘅霸氣無晒，加埋作客對住狀態佳兼上回合已先勝一仗嘅利雲特，我當然支持主隊！
周鵬
商業1台《球迷集中贏》主持
電郵：[email protected]