今年娛樂圈算係喜事多，除咗有好多人結婚外，仲有唔少藝人生BB㖭，好似袁詠儀（靚靚）咁就準備為人母，為張智霖產下愛情結晶。噚日葛民輝喺商台新節目《久久久但願人長久》中，打電話問靚靚嘅近況。聽把聲，呢個準媽咪好精神，應該仲係周街走，靚靚話個BB隨時都可以出世，雖然BB預產期喺呢個月尾，但就話BB有機會提早「見世面」。
準備入院物品
靚靚喺電話度話：「我隨時都生得，佢（BB）好似唔耐煩，每晚我瞓唔到覺，就好想佢快啲出嚟，但下晝我坐喺梳化睇電視，感覺到佢喺肚入面郁郁吓，就覺得好得意，有時又唔想佢出嚟住。」貪玩嘅靚靚原來喺街度做訪問，佢話準備緊入院嘅物品：「我朋友叫我執嘢，但都係啱啱先執完。」
靚靚講到個BB喺肚入面好活躍，但爸爸張智霖就話：「唔係，佢好柔軟。」為迎接新生命，張智霖近期推咗唔少要出埠嘅工作。阿葛問佢有乜嘢同靚靚講，佢就公開咁話：「我撐硬你囉。」講到BB幾時出世，張智霖就話：「冇乜所謂啦，日日都係好日。」
