外圍偏軟，加上內地突然調高銀行準備金，昨日唔少人其實睇緊港股會回幾多，但恒指稍回55點便發力挾上，最後大升186點，收18936。
收市後滙豐銀行突然公布減息1/4厘，反映市場水浸得好緊要，同時亦解釋了港股近日升勢凌厲的原因。好友並非出師無名，亂挾一通，淡友亦應輸得心服。
恒指今日要破萬九關看來勢在必行，但往上還會升多少才出現調整就不易估，如果散戶肯大舉入市搶貨，則調整會來得早些；如果散戶仍採觀望態度，大市相信會再挾得高些。現時肯博是最容易贏錢的時間，而勝負關鍵則是市勢急速逆轉時，能否全身而退或走避不及，而當中牽涉個人的運氣、經驗、能力及炒賣紀律。
趙飛雲曾經歷多次股災，難免傾向保守些，現時推介的股票大多相對較穩陣，並經常提住大市一旦轉勢要果斷跳車。事實上，股票止蝕如割肉，就算在危急時，亦唔係人人可以果斷執行。
昨日國航（753）一開市已跌穿4元止賺位，追沽至3.95元才沽清。另外在3.58元買入6萬股工行（1398），工行炒獲納入富時及摩指成份股，但呢類巨無霸短線升極有譜，短炒能執5-7%已非常理想。
據聞本港銀行今次減息並非一次過，正路可炒落後的地產股，揀炒味濃可吼美聯物業（1200），現水平可短炒。
趙飛雲