今時今日，資料爆炸嘅年代，球迷亦都面向世界化；星期六、日賭波高峯期，波友真係可以由下午嘅日本波，賭到夜晚歐洲各地聯賽，臨天光仲可以賭埋巴西波先瞓，簡直好似環遊世界咁。
不過，有時球迷最唔好就有種「求賭」心態，有時為追數，有時贏咗又唔夠喉，有時更加只係貪手癮，下注去一啲自己唔熟嘅比賽度，命中率當然唔高啦，無形中浪費注碼；所以莊家就抱住呢啲大眾心理，球賽愈開愈多，咁就愈贏愈多啦。
好似馬會周中就開皇家聯賽盃畀大家賭嘞；皇家聯賽盃之前兩屆，只不過係畀北歐丹麥、挪威同瑞典3國聯賽，作為開「咧」前熱身嘅盃賽，競爭意味真係唔大，今屆就改制，放在收「咧」後打，同樣由3國聯賽前4名角逐，不過講真，北歐各隊打完聯賽，都打到殘，有冇心機再搏呢個盃呢？
賭皇家聯賽盃嘥氣
或者球迷覺得呢個盃可能獎金高，或者吸引球隊搏命；不過小弟睇過皇家聯賽盃網頁，捧走今屆冠軍嘅球隊，可以獲得2,000丹麥克朗冠軍獎金，咁即係幾多港元呀？唔係我嚇大家，只係2,600蚊港元，南華贏傑志都30萬啦。又冇名又冇利，球隊戰意真係好有問題，真係你賭埋我嗰份嘞。文：牽牛