愛華頓近年踢聯賽盃有心有力，但無咗同樣重要嘅運氣因素；聽日第4圈秩序，「拖肥糖」主場對住前季曾半力應戰，都將其踢出局嘅阿仙奴，客軍W有逾兩倍甚吸引。冷選同為聽晚秩序嘅阿士東維拉，作客「車仔」法定時間內不敗。華度
英格蘭聯賽盃，早已為國內強隊們唾棄，2線球隊就仍然趨之若鶩，其中愛華頓近幾季喺早階段賽事，已經排出強陣應戰，但卻連番出現失手情況，枉費特意等到開波前，睇埋出場陣容至落注嘅球迷一番苦心。
前季第4圈賽事，愛華頓作客鬥阿仙奴，主隊只係排出一隊副選兵，當時阿仙奴主將亨利、皮利斯及龍格保等通通被收起，相反愛華頓就排出擁有卡希爾、加維臣、基爾賓尼及尤保等主將嘅正選陣容。結果，阿仙奴贏3:1晉級！
前季半力曾勝愛華頓
上季第3圈賽事，愛華頓主場對米杜士堡，雖然「米堡」當晚排出嘅正選陣容都有啲睇頭，無阿仙奴咁「敷衍了事」，但愛華頓亦繼續無「揸流攤」，同樣排出包括阿廸達、菲臘尼維利及比亞堤等在陣嘅正選陣容應戰。點知，愛華頓又輸0:1出局。
今季，愛華頓又繼續向呢個盃仔進發，上圈主場對英冠聯球隊盧頓，同樣強陣出擊之下，大勝4:0晉級。但聽日喺第4圈秩序，又對住英超聯球隊，仲係前季以半力就擯其出局嘅阿仙奴呢個剋星對手。
即使愛華頓今日又強陣出擊，阿仙奴半力應戰，宿命呢啲嘢唔到你唔信，係同呢個盃仔無緣就點勉強都無用。阿仙奴單W有逾兩倍，唔係成日有，值得出擊。
維拉係車仔剋星博和
今次冷選揀番聯賽盃場合，博阿士東維拉作客車路士取得法定時間90分鐘內不敗成績，開個和局。車路士近年橫行國內賽事，但維拉都算係佢哋剋星之一，今季聯賽「車仔」主場都只能夠以1:1打和呢支今季由奧尼爾領軍嘅中部球隊；近7次交手，「車仔」都只係贏過兩次。
投資特攻隊金句
即使愛華頓今日又強陣出擊，阿仙奴半力應戰，宿命呢啲嘢唔到你唔信，係同呢個盃仔無緣就點勉強都無用。