香港地價不嬲貴，無奈「迫」出無窮創意，好似喺半山舊樓之間，夾硬起咗全世界最長嘅扶手電梯；又或者，一家七口屈喺300呎唔夠嘅單位，於是有人發明摺床，當然未計收得埋嘅竹梯、隨時變做宿舍嘅貨櫃等等。
華華講緊嘅係上個月香港首次參加威尼斯國際雙年展嘅展品。𠵱家個展覽返香港，由國際大師貝聿銘設計嘅中銀大廈展出，12月8日移師九龍公園。噚日嘅開幕典禮，唔少得贊助嘅中銀和廣北，仲有乜都關佢事嘅何志平局長。
肥平猛話香港兼蓄中西文化，傳統、時尚同環保嘅建築隨時睇得到，非常難得……不過，華華諗起中環天星碼頭又要搬竇，有成50年歷史、跟英國西敏寺同款嘅大笨鐘鐘樓，就算幾好都要拆，只係留番鐘芯紀念，幾多人反對都冇用，真係唔明政府點諗！